نئی دہلی: وزیر اعظم نریندر مودی نے منگل کی شام کو سشما سوراج بھون میں وزیر اعظم کے دفتر (پی ایم او) اور وزارت خارجہ (ایم ای اے) کے افسران اور عملے سے ملاقات کی اور جی 20 سربراہی اجلاس کے کامیابی سے انعقاد کے لیے ان کی ستائش کی۔ ذرائع کے مطابق وزیر اعظم نریندر مودی نے وزیر خارجہ ایس جے شنکر کے ساتھ عہدیداروں سے ملاقات کی اور کثیر جہتی تقریب کی کامیابی کے لئے ان کی ستائش کی، جس میں تقریباً 30 ممالک کے سربراہان مملکت نے شرکت کی۔
جی ٹوئنٹی رہنماؤں کے سربراہی اجلاس نے دہلی اعلامیہ کو بھی اپنایا، جسے تمام عالمی رہنماؤں نے یوکرین کے تنازعہ کے متنازعہ مسئلے کے حوالے سے بڑی تدبیر سے نمٹنے اور حتمی نتائج کی دستاویز پر اتفاق رائے پیدا کرنے کا انتظام کرنے پر سراہا تھا۔ ذرائع نے بتایا کہ وزیر اعظم نریندر مودی نے جی 20 سربراہی اجلاس میں اپنے تجربات پر حکام کے ساتھ ڈی بریفنگ کی۔ ذرائع نے مزید کہا کہ وزیراعظم نریندر مودی نے وزارت خارجہ کے افسران اور تمام سطح کے عملے کے ساتھ اپنے G20 کے تجربے پر بات چیت کی۔
واضح رہے کہ قومی دار الحکومت نئی دہلی میں 9 اور 10 ستمبر کو دو روزہ جی ٹوئنٹی سربراہی اجلاس منعقد کیا گیا تھا جس کی صدارت بھارت نے کی۔ جی ٹوئنٹی کے اس اجلاس میں 30 ممالک کے صدور، وزرائے اعظم اور اعلی حکام نے شرکت کی۔ اس اجلاس میں مختلف امور پر بات چیت کی گئی۔
مزید پڑھیں: جی ٹوئنٹی میں دہلی اعلامیہ بھارت کی ایک بہت بڑی کامیابی
وزیراعظم نریندر مودی نے جی ٹوئنٹی اجلاس کے دوران مختلف ممالک کے صدور اور وزرائے اعظم سے ملاقات بھی کی جن میں امریکی صدر جوبائیڈن، بنگلہ دیش کی وزیراعظم شیخ حسینہ، ترکی کے صدر رجب طیب اردغان اور سعودی عرب کے ولی عہد اور وزیراعظم محمد سلمان قابل ذکر ہے۔ مختلف ممالک کے سربراہان سے دو طرفہ ملاقات کے دوران دونوں ممالک کے درمیان بہتر تعلقات، تجارت اور دیگر اہم امور پر بات چیت کی گئی۔
