کورونا وائرس کے سبب دہلی کے سات اضلاع میں 31 مارچ تک لاک ڈاون اور دفعہ 144 کا اعلان کیا جاچکا ہے لیکن نئی دہلی کے آنند وہار بس اسٹیشن پر ان تمام احکامات کا کوئی خاص اثر نہیں دکھائی دے رہا ہے۔
دہلی میں جہاں چار لوگوں کے جمع ہونے کی ممانعت ہے وہاں پر سینکڑوں کی تعداد میں لوگ موجود ہیں اور جہاں گاڑیاں نہ چلنے کی بات کی جارہی ہے وہاں پر بسوں میں لوگ بھرے ہوئے ہیں۔
آنند وہار بس اسٹیشن کی ایسی صورت حال سے حکومت اور پولیس کی کاہلی اور غیر ذمہ داری کا اندازہ لگایا جا سکتا ہے۔
عوام سے اس طرح کی حرکات و سکنات کی امید کی جاسکتی ہے لیکن ان کو روکنے اور انکو حکومت کے احکامات پر عمل کرانے اور ان میں ڈر پیدا کرنے کے لیے پولیس اور سرکاری عملہ کا حرکت میں آنا لازمی ہوتا ہے لیکن یہاں ایسا کچھ بھی نہیں دکھا۔
ایسے غیر ذمہ دار لوگ اس وبائی بیماری میں جہاں اپنی زندگی سےکھیل رہے ہیں وہیں دوسروں کی زندگیوں کو بھی برباد کرنے پر تلے ہوئے ہیں۔ لوگوں کا یہ رویہ کتنا غیر ذمہ دارانہ ہے اس کا اندازہ اس بھیڑ سے لگایا جاسکتا ہے۔
ملک میں کورونا وائرس کی وبا پھیلتی جارہی ہے ۔عام لوگوں کو تشویش لاحق ہے لیکن یہ دوسروں کی زندگیوں کو داؤ پر لگا رہے ہیں۔
