دہلی: قومی کمیشن برائے حقوق اطفال نے تمام ریاستوں کے چیف سکریٹریز اور مرکز کے زیرانتظام علاقوں کے ہوم سکریٹریز سے غیرمسلم بچوں کے مدارس میں داخلوں کی خبروں سے متعلق وضاحت طلب کی ہے۔ قومی کمیشن نے قوانین کی خلاف ورزی کرنے والے سرکاری فنڈز سے چلنے والے اور تسلیم شدہ تمام مدارس کی تحقیقات کرنے کی ہدایت دی ہے۔ بعض خبروں کا نوٹس لیتے ہوئے جس میں کہا گیا کہ کچھ مدارس میں غیرمسلم بچوں کو داخلہ دیا جارہا ہے نیشنل کمیشن فار پروٹیکشن آف چائلڈ رائٹس (این سی پی سی آر) کے چیئرپرسن پریانک کانونگو نے تمام ریاستوں کے چیف سیکرٹریز اور مرکز کے زیر انتطام علاقوں کے ہوم سیکرٹریز کو ایک خط لکھا ہے کہ وہ اپنے اپنے علاقوں کے تمام سرکاری فنڈڈ اور تسلیم شدہ مدارس کی تحقیقات کریں۔ NCPCR Asks States to Probe Govt Funded Madarsas
کمیشن نے کہا کہ یہ دیکھا گیا ہے کہ وہ (مدارس) اپنے اداروں میں غیر مسلم بچوں کو داخل کروا رہے ہیں۔ آپ انکوائری کے بعد ایسے تمام بچوں کو اسکولوں میں داخل کر دیں۔ اصولوں کے مطابق غیر مسلم بچوں کو مدارس میں داخل نہیں کیا جا سکتا۔ اگر وہ ایسا کر رہے ہیں تو یہ قواعد کے خلاف ہے اور تعزیری کارروائی کی ضرورت ہے۔
مدارس، بطور ادارہ، بنیادی طور پر بچوں کو مذہبی تعلیم دینے کے ذمہ دار ہیں۔ کمیشن کے خط میں کہا گیا ہے کہ 'تاہم، یہ بھی معلوم ہوا ہے کہ وہ مدارس جنہیں حکومت کی طرف سے مالی امداد دی جاتی ہے یا حکومت کی طرف سے تسلیم کیا گیا ہے، وہ بچوں کو مذہبی اور کسی حد تک رسمی دونوں طرح کی تعلیم دے رہے ہیں۔ مزید یہ کہ کمیشن کو یہ بھی معلوم ہوا ہے کہ کچھ ریاستی حکومتیں انہیں اسکالرشپ بھی فراہم کر رہی ہیں۔ جو آئین ہند کے آرٹیکل 28(3) کی واضح خلاف ورزی ہے جو تعلیمی اداروں کو والدین کی رضامندی کے بغیر بچوں کو کسی بھی مذہبی تعلیم میں حصہ لینے کا پابند کرنے سے منع کرتا ہے۔
یہ بات قابل ذکر ہے کہ بھارت کا آئین ریاست کی یہ ذمہ داری بناتا ہے کہ وہ تمام بچوں کو بغیر کسی امتیاز اور تعصب کے مفت اور لازمی تعلیم فراہم کرے اور اس بات کو یقینی بنائے کہ بچے RTE ایکٹ 2009 کے سیکشن 6 کے مطابق رسمی تعلیم حاصل کرنے کے لیے پڑوس کے اسکولوں میں جائیں۔
حقوق اطفال کے تحفظ کے کمیشن (CPCR) ایکٹ 2005 کے تحت تشکیل دیے گئے قانونی ادارے نے، جس کا مقصد بچوں کے حقوق کا تحفظ کرنا ہے، کہا کہ 'تمام سرکاری فنڈڈ اور تسلیم شدہ مدارس کی تفصیلی انکوائری کریں جو آپ کی ریاست میں غیر مسلم بچوں کو داخلہ دے رہے ہیں۔ انکوائری میں ایسے مدارس میں جانے والے بچوں کی جسمانی تصدیق شامل ہونی چاہیے۔ انکوائری کے بعد ایسے تمام بچوں کو رسمی تعلیم حاصل کرنے کے لیے اسکولوں میں داخل کروائیں۔ کمیشن نے آپ کی ریاست کے تمام غیر نقشہ شدہ مدارس کی نقشہ سازی اور فوری اثر سے رسمی تعلیم حاصل کرنے کے لیے تمام بچوں کو اسکولوں میں داخل کرنے کا حکم دیا۔ ریاستوں اور مرکز کے زیر انتظام علاقوں کی طرف سے کارروائی کی رپورٹ 8 دسمبر 2022 سے 30 دنوں کے اندر کمیشن کے ساتھ شیئر کی جانی ہے۔
این سی پی سی آر کے خط میں آئین میں 86ویں ترمیمی ایکٹ 2002 کا حوالہ دیا گیا ہے جس میں آرٹیکل 21-A، چھ سے چودہ سال کی عمر کے تمام بچوں کو مفت اور لازمی تعلیم فراہم کرنے کا تذکرہ ایک بنیادی حق کے طور پر اس طرح کرتا ہے۔ بھارت کے آئین میں 86ویں ترمیم کے نتیجے میں 6 سے 14 سال کی عمر کے بچوں کے لیے مفت اور لازمی تعلیم کے حق کے نفاذ کے لیے رائٹ ٹو ایجوکیشن RTE ایکٹ اگست 2009 میں بھارت کی پارلیمنٹ نے منظور کیا تھا۔ نیشنل کمیشن فار پروٹیکشن آف چائلڈ رائٹس (این سی پی سی آر) کو آر ٹی ای ایکٹ 2009 میں موجود دفعات اور حقوق کی نگرانی کرنے کا پابند بنایا گیا ہے۔
