اسمرتی ایرانی نے کہا کہ ’اس مہم کے دورس نتائج برآمد ہوں گے اور بچوں کی صحت پر طویل مدتی اثرات مرتب ہوں گے۔
بچوں اور خواتین میں تغذیے کی کمی کو دور کرنے کے مقصد کے تحت جاریہ مہینے ’تیسرا راشٹریہ پوشن ماہ‘ کے طور پر منایا جارہا ہے۔ پوشن ماہ کا مقصد خواتین اور بچوں تک تغذیہ بخش غذا کی فراہمی اور اس کے تئیں شعور بیدار کرنا ہے۔
وزارت خواتین و اطفال بہبود کے مطابق پوشن ماہ، پوشن ابھیان کے تحت ہر سال منایا جاتا ہے جس کی شروعات 2018 میں کی گئی تھی۔ ملک میں کووڈ۔19 کی صورتحال کے پیش نظر وزارت سبھی متعلقہ فریقوں کی حوصلہ افزائی کررہی ہے کہ وہ ڈجیٹل پلیٹ فارم کے ذریعہ پوشن ماہ منائیں۔
وزیراعظم نریندر مودی نے بھی گذشتہ من کی بات پروگرام کے دوران تغذیہ بخش غذا کی اہمیت پر زور دیا تھا۔ انہوں نے ماں اور بچوں کےلیے مناسب تغذیہ کی ضرورت پر زور دیا اور لوگوں کی شراکت داری کی حوصلہ افزائی کی تھی۔
بچوں میں تغذیہ کی کمی ملک کےلیے ایک بڑا مسئلہ ہے۔ نیشنل فیملی ہیلتھ سروے 16-2015 کے مطابق بھارت میں ہر دوسرا بچہ کم غذائیت کا شکار ہے۔
