مولانا ولی رحمانی کا انتقال ناقابل تلافی نقصان: مولانا رابع حسنی ندوی

امیر شریعت مولانا ولی رحمانی کے انتقال پر آل انڈیا مسلم پرسنل لا بورڈ کے صدر مولانا رابع حسنی ندوی نے کہا کہ مولانا ولی رحمانی کا اس دنیا سے رخصت ہونا ناقابل تلافی نقصان ہے اور ان کے جانے سے جو خلا پیدا ہوا ہے اسے پُر کرنا مشکل ہوگا۔

معروف عالم دین اور آل انڈیا مسلم پرسنل لا بورڈ کے جنرل سکریٹری حضرت مولانا ولی رحمانی کا پٹنہ کے ایک نجی ہسپتال میں انتقال ہوگیا، وہ گذشتہ کئی دنوں سے علیل تھے۔

مولانا ولی رحمانی کے انتقال پر آل انڈیا مسلم پرسنل لا بورڈ کے صدر اور دارالعلوم ندوۃ العلما کے ناظم اعلیٰ مولانا رابع حسنی ندوی نے کہا کہ امیر شریعت کا انتقال مسلم قوم کے لیے بڑا خسارہ ہے اور ان کے جانے سے جو خلا پیدا ہوا ہے اسے مکمل کرنا انتہائی مشکل کام ہوگا۔

انہوں نے کہا کہ مولانا ولی رحمانی دور اندیش اور معاملہ فہم انسان تھے اور کسی بھی معاملے کو انتہائی بہتر انداز میں حل کرتے تھے۔