نئی دہلی: دہلی حکومت کورونا وبا کے دوران اپنی جان گنوانے والے 14 کورونا واریئر کے خاندانوں کو ایک کروڑ روپے دے گی۔
جمعہ کو دہلی کے نائب وزیر اعلی منیش سسودیا کی صدارت میں وزراء کے گروپ کی میٹنگ میں اسے منظوری دی گئی۔ مسٹر سیسودیا نے کہا کہ دہلی کے کورونا واریئر نے اپنی جانوں کی پروا کیے بغیر انسانیت اور سماج کی حفاظت کے لیے وبا کے دوران اپنی جانیں قربان کیں۔ انہوں نے کہا کہ دہلی حکومت ان کے جذبے کو سلام کرتی ہے۔ یقیناً اس رقم سے مرنے والے کورونا واریئر کے اہل خانہ کا نقصان تو پورا نہیں ہو سکتا لیکن ان کے اہل خانہ کو باعزت زندگی گزارنے کے ذرائع ضرور ملیں گے۔
ڈپٹی چیف منسٹر نے کہا کہ کورونا وبا ایک خوفناک بحران ہے۔ اس بحران نے ہر کسی کے ذہن میں خوف پیدا کر دیا تھا، لیکن ہمارے کورونا واریئر نے اپنی جان خطرے میں ڈال کر دہلی کو اس بحران سے نکالنے کا کام کیا۔ ڈاکٹروں، طبی عملے، امدادی عملے، صفائی کرنے والوں سمیت ہزاروں کورونا واریئر نے اس وبائی مرض سے لڑنے کے لیے دن رات کام کیا تھا۔ انہوں نے کہا کہ ہمارے کورونا سورماؤں نے عوام کی خدمت کرتے ہوئے اپنی جان کی بھی پروا نہیں کی اور خود ہی اس میں مبتلا ہو کر شہید ہو گئے۔ دہلی اور ملک کورونا واریئر کی اس قربانی کو نہیں بھولیں گے۔ انہوں نے کہا کہ کیجریوال حکومت کی اس اسکیم سے کورونا واریئر کے خاندانوں کو یہ اعتماد ملتا ہے کہ حکومت اور سماج ہر ضرورت میں ان کے ساتھ ہے۔ اس سے قبل 59 کورونا واریئر کے خاندانوں کو دہلی حکومت کی طرف سے ہر ایک کو 1 کروڑ روپے کا اعزازیہ مل چکا ہے۔
یہ بھی پڑھیں: Delhi govt On Clean Water دہلی حکومت ہر گھر کو 24 گھنٹے صاف پانی فراہم کرے گی، سسودیا
یواین آئی
