دہلی کی پٹیالہ ہاؤس کورٹ نے کسان تحریک سے متعلق ٹول کٹ سوشل میڈیا پر پھیلانے کے الزام میں گرفتار ماحولیاتی کارکن دیشا روی کو پانچ دنوں کی پولیس حراست میں بھیج دیا ہے۔ دہلی پولیس کی سپیشل سیل نے دیشا کو بنگلورو سے گرفتار کیا تھا۔
دہلی پولیس نے آج دیشا روی کو ڈیوٹی مجسٹریٹ کے سامنے پیش کیا جس کے بعد کورٹ نے ملزمہ کو پانچ دنوں کی پولیس حراست میں بھیجنے کا حکم دیا۔
دہلی پولیس کا الزام ہے کہ دیشا روی نے کسان تحریک سے متعلق اس دستاویز کو شیئر کیا جسے بین الاقوامی ماحولیاتی کارکن گریٹا تھنبرگ نے ٹویٹ کیا تھا۔ دیشا پر ٹول کٹ نام کے اس دستاویز کو ایڈٹ کر کے اس میں کچھ چیزیں جوڑنے اور اسے آگے فارورڈ کرنے کا الزام ہے۔
یہ ٹول کٹ (دستاویز) تب موضوع بحث بنا تھا جب اسے بین الاقوامی سطح پر مشہور سماجی کارکن گریٹا تھنبرگ نے کسان تحریک کی حمایت کرتے ہوئے اپنے ٹویٹر اکاؤنٹ پر شیئر کیا تھا۔ اس کے بعد دہلی پولیس نے گذشتہ 4 فروری کو ایف آئی آر درج کیا تھا۔
دہلی پولیس نے اس معاملے میں دفعہ 124 اے، 120 اے، اور 153 اے کے تحت ملک کو بدنام کرنے، مجرمانہ سازش رچنے اور نفرت کو فروغ دینے کے الزام میں ایف آئی آر درج کیا ہے۔
