قومی دارالحکومت دہلی میں ایک بی جے پی کارکن اور اس کے بیٹے کی سرعام گولی مار کر قتل کر دیا گیا۔ اہل خانہ کا رو رو کر برا حال ہے۔ رشتہ داروں کا خیال ہے کہ جس طرح سے یہ واردات انجام دیا گیا ہے، اس میں علاقے کے کچھ لوگ ملوث ہوسکتے ہیں۔ کنبہ اس پورے معاملے میں انصاف کی التجا کر رہا ہے۔
اطلاعات کے مطابق، نند نگری تھانہ علاقہ کے سندر نگری آج گولیوں کی آواز سے گونج اٹھا۔ در حقیقت، آج کی صبح نامعلوم شرپسندوں نے بی جے پی کارکن ذوالفقار قریشی کو گولی مار کر قتل کردیا۔ فائرنگ کے دوران اس کا بیٹا جانباز قریشی بھی بری طرح زخمی ہوگیا تھا اور اسے فوری طور پر صفدرجنگ اسپتال پہنچایا گیا جہاں علاج کے دوران اس کی موت ہوگئی۔ سرعام باپ اور بیٹے کے قتل کے سنسنی خیز واقعہ نے علاقے میں خوف و ہراس کی فضا پیدا کردی ہے۔
یہ بھی پڑھیں: راجدھانی میں خراب فضائی آلودگی کی صورتحال برقرار
جانکاری کے مطابق، ذوالفقار اپنے گھر سے نکل کر مدینہ مسجد میں نماز پڑھنے جارہا تھا، وہ مسجد جا ہی رہا تھا کہ حملہ آوروں نے مسجد کے دروازے پر ہی فائرنگ کردی۔ فائرنگ کے دوران باپ کو بچاتے ہوئے اس کا بیٹا بھی بری طرح زخمی ہوگیا۔ زخمی بیٹے کو فوری طور پر قریبی اسپتال لایا گیا جہاں سے اس کی حالت خراب ہونے کے بعد اسے صفدرجنگ اسپتال ریفر کردیا گیا جہاں وہ علاج کے دوران دم توڑ گیا۔
اس معاملے میں پولیس کی تفتیش جاری ہے۔
