کانگریس نے ہریانہ کے کرنال میں کسان مہاپنچایت کے دوران حکومت پر کسانوں کو دبانے کا الزام لگاتے ہوئے کہاکہ ریاست کے وزیراعلی منوہر لال کھٹر کو کسانوں سے بات کرنی چاہئے اور اگر وہ بات چیت نہیں کرتے ہیں تو انہیں فوری طورپر عہدہ سے استعفی دے دینا چاہئے۔
کانگریس مواصلات کے سربراہ رندیپ سنگھ سرجے والا نے منگل کو یہاں صحافیوں سے کہا کہ بھارتیہ جنتا پارٹی کی حکومت اپنے چنندہ دوستوں کو فائدہ پہنچانے کے لئے کسانوں کے ساتھ ظلم کررہی ہے۔ ان کا کہنا تھا کہ کرنال میں پولیس فورس کے جوانوں نے کسانوں کو مارا پیٹا ہے۔ پولیس فورس کے جوانوں نے ان کے ساتھ ناانصافی کی ہے جس کی کانگریس سخت مذمت کرتی ہے۔
مزید پڑھیں:کسان کی آواز کے سامنے اقتدار کا تکبر نہیں چلتا: پرینکا
انہوں نے کہا کہ کسان تینوں مخالف قوانین کو ختم کرنے کی مانگ کررہے ہیں اور حکومت اپنی انا توڑنے کو تیار نہیں ہے۔ ان کا کہنا تھا کہ بات چیت کے ذریعہ مسئلہ کا حل نکالا جانا چاہئے اور حکومت کو ان تینوں قوانین کو ختم کرنے کا اعلان کرنا چاہئے۔
ترجمان نے کہا کہ معاملہ مظفر نگر سے کرنال تک سنگین ہوتا جارہا ہے اس لئے وزیراعظم نریندر مودی کو خود پہل کرتے ہوئے آج رات ہی زرعی مخالف تینوں قوانین کو ختم کرنے کا اعلان کرنا چاہئے۔
