چھتیس گڑھ کے ضع بلودا بازار کے بھٹگاؤں میں پیر کی شب بھٹگاؤں تھانہ انچارج پر حملہ کرنے والے 6 گرفتار ملزمین کووڈ اسپتال سے فرار ہوگئے ہیں۔ جس کے بعد سے محکمہ پولیس میں افراتفری کا ماحول ہے۔
اطلاعات کے مطابق پیر کی رات بھٹگاؤں پولیس اسٹیشن انچارج ایچ آر راترے کو ایک شکایت موصول ہوئی تھی جس کے بعد اسٹیشن انچارج اپنے ایک ملازم کے ساتھ موقع پر پہنچے۔ موقع پر پہنچنے سے قبل ہی ان کی گاڑی خراب ہوگئی، جہاں سے ڈرائیور گاڑی کو بنوانے چلا گیا، اس دوران اسٹیشن انچارج کو تنہا دیکھ کر کچھ شرپسندوں نے ان پر حملہ کردیا جس سے وہ زخمی ہوگئے۔
اس واقعے کے بعد پولیس نے کارروائی کرتے ہوئے 6 شرپسند عناصر کو گرفتار کرلیا اور سبھی ملزمین کا کورونا ٹیسٹ کرایا، جس میں پانچ افراد کورونا مثبت پائے گئے، جن کو علاج کے لیے گووندون کووڈ اسپتال میں داخل کیا گیا تھا۔ لیکن پولیس کی لاپرواہی کی وجہ سے تمام ملزمین فرار ہوگئے۔
اے ایس پی نویدیتا پال نے ای ٹی وی بھارت سے گفتگو کرتے ہوئے بتایا کہ تمام 6 ملزمان اسپتال سے فرار ہوگئے ہیں، جن کی تلاش جاری ہے۔ انہوں نے بتایا کہ کورونا کی گھبراہٹ کی وجہ سے ملزمان نے ایسا قدم اٹھایا ہوگا۔ اے ایس پی نے ملزمین کو جلد ہی پکڑنے کا دعویٰ کیا ہے۔
