دانتے واڑہ کے پولیس سپرنٹنڈنٹ ابھیشک پلاوا نے بتایا کہ ماؤنواز نظریہ سے مایوس 27 نکسلائٹز نے پولیس کی جانب سے چلائی گئی مہم ’لون وراتو‘ (اپنے گھر واپس) کے چلتے خود کو قانون کے حوالہ کردیا۔
27 ماؤنوازوں نے آج ضلع کے بارسور تھانے میں سینئر پولیس و سی آر پی ایف عہدیداروں کے سامنے پیش ہوکر اپنے ہتھیار حوالے کردیئے۔ نکسلیوں کی بازآباد کاری کےلیے جاریہ سال جون میں شروع کی گئی مہم کے مثبت نتائج سامنے آئے ہیں جبکہ اب تک 177 ماؤنوازوں نے ہتھیار ڈالے ہیں۔
ابھیشیک پلاوا نے کہا کہ آج 6 خواتین سمیت 27 نکسلائٹز نے بارسور تھانے میں اعلیٰ پولیس و سی آر پی ایف کے عہدیداروں کے روبرو سرینڈر کردیا۔
انہوں نے سیکوریٹی وجوہات کی بنا پر سرینڈر کئے گئے ماؤنوازوں کی شناخت ظاہر نہیں کی جبکہ انہوں نے مزید بتایا کہ ’11 کا تعلق گفا گاؤں سے، 7 کا تعلق بیدما سے، 5 کا مانگنار اور 3 کا تعلق ہتاواڑا سے ہے‘۔
سپرنٹنڈنٹ آف پولیس نے بتایا کہ ہتھیار ڈالنے والے پانچ ماؤنوازوں کے سروں پر ایک ایک لاکھ روپئے کا انعام رکھا گیا تھا۔
