اوپیندر کشواہا سے ای ٹی وی بھارت کی خاص بات چیت

راشٹریہ لوک سمتا پارٹی کے قومی صدر اور سابق مرکزی وزیر اوپیندر کشواہا نے بہار کے وزیراعلی نتیش کمار کو نشانہ بناتے ہوئے کہا کہ 'ان کا رویہ بہار کے لوگ دیکھ رہے ہیں۔ انہیں بس کرسی کی فکر ہے۔ عوام سے ان کو کوئی مطلب نہیں ہے۔'

بہار اسمبلی انتخابات کی تیاریاں زور و شور سے جاری ہیں۔ این ڈی اے اور عظیم اتحاد کے درمیان سیٹ شیئرنگ کے سلسلے میں بات چیت کا دور بھی جاری ہے۔ اس کے ساتھ ہی رہنماؤں کے پارٹی بدلنے کا عمل بھی تیز ہوگیا ہے۔

وہیں چراغ پاسوان کا حکومت کو تنقید کا نشانہ بنانے والے بیان پر کئی طرح کے سوالات اٹھ رہے ہیں۔ ان ہی سب امور پر آر ایل ایس پی کے قومی صدر اوپیندر کشواہا نے ای ٹی وی بھارت کے ساتھ خصوصی گفتگو کی۔

اس دوران جب ان سے پوچھا گیا کہ اگر چراغ پاسوان عظیم اتحاد میں شامل ہونا چاہتے ہیں تو کیا ان کا استقبال کیا جائے گا؟

اس پر اوپیندر کشواہا نے کہا کہ 'ابھی ایسی باتوں پر کسی قسم کا تبصرہ کرنے کا کوئی فائدہ نہیں ہے۔ اسمبلی انتخابات سے قبل جو کچھ ہوگا اس کا پتہ چل جائے گا۔'

اس کے ساتھ ہی اوپیندر کشواہا نے نتیش کمار کو نشانہ بناتے ہوئے کہا کہ 'ان کا رویہ بہار کے لوگ دیکھ رہے ہیں۔ انہیں بس کرسی کی فکر ہے۔ عوام سے ان کو کوئی مطلب نہیں ہے۔'

ساتھ ہی انہوں نے یہ الزام بھی عائد کیا کہ 'انہوں نے اپنے دور اقتدار کے 15 سالوں میں کئی باضابطگیاں کی ہیں۔'

سیٹ شیئرنگ کے بارے میں کشواہا نے کہا کہ 'عظیم اتحاد کے مابین سیٹ شیئرنگ کا کوئی مسئلہ نہیں ہے۔ مسئلہ یہ ہے کہ این ڈی اے کو کیسے شکست دی جائے۔ جہاں تک نشست کا تعلق ہے۔ ہم اس پر تبادلہ خیال کریں گے۔'

اگرچہ انہوں نے کہا کہ 'اب وقت آگیا ہے۔ جلد ہی عظیم اتحاد میں سیٹ شیئرنگ پر بات ہونی چاہئے کیوںکہ جتنی جلدی بات ہوگی اتنا زیادہ فائدہ ہوگا۔'

واضح رہے کہ ایل جے پی کے قومی صدر چراغ پاسوان نے اسمبلی انتخابات کے حوالے سے ایک پوسٹر جاری کیا ہے جس میں لوک جن شکتی پارٹی کا نیا نعرہ دیا گیا ہے۔ 'دھرم نہ جات، کریں سب کی بات'۔

اشتہار کے ذریعہ چراغ نے 'نیا بہار' اور نوجوانوں کو ساتھ لے کر چلنے کی بات کی ہے۔