گیا: ریاست بہار کے ضلع گیا ہوائی اڈہ سے 21 مئی سے عازمین کی پرواز شروع ہوگی۔ آج انتظامیہ کے اعلیٰ حکام نے ایئرپورٹ اتھارٹی کے افسران سے ایئرپورٹ پر تیاریوں کے تعلق سے جانکاری حاصل کی۔ ڈسٹرک مجسٹریٹ ڈاکٹر تیاگ راجن اور ایس ایس پی آشیش بھارتی ایئرپورٹ ڈائریکٹر بنکجیت ساہا نے سلسلے وار طریقے سے تیاریوں کے حوالے سے تبادلۂ خیال کیا۔ ڈی ایم تیاگ راجن نے کہا کہ ماضی میں یہاں ایئرپورٹ پر جن محکموں سے جو انتظامات ہوتے تھے وہ اس برس بھی ہوں گے۔ انتظامات پہلے سے بہتر ہوں اس کو متعلقہ افسران یقینی بنائیں، ایئرپورٹ ڈائریکٹر بنکجیت ساہا نے کہا کہ ایئرپورٹ کی طرف سے احاطے میں ایک وسیع پنڈال بنوایا جاتا ہے تاکہ عازمین حج اس میں کچھ دیر قیام کریں اور پھر اس کے بعد وقت مقررہ پر وہ روانہ ہوں۔ عازمین حج کو پریشانی نہیں ہو اس کا خیال رکھا جاتا ہے۔
انہوں نے کہا کہ پنڈال کا کام کچھ دن بعد شروع ہوجائے گا اس میں قیام گاہ، نماز گاہ مرد وخواتین کے لیے علیحدہ ہوں گے، نوڈل افسر حج جتیندر کمار نے بتایا کہ انتظامیہ کی جانب سے کنٹرول روم ہیلتھ چیک اپ کاؤنٹر، انفارمیشن کاونٹر بنائے جائیں گے۔ ایس ایس پی آشیش بھارتی نے کہا کہ سکیورٹی کے پختہ انتظامات ہوں گے۔ شفٹوں میں یہاں افسران کی نگرانی میں پولیس جوانوں کی تعیناتی ہوگی۔ ضلع سرحد سے عازمین حج کی بس جو پٹنہ حج بھون سے گیا آئے گی اس کا اسکاٹ پولیس جوان کرکے ایئرپورٹ تک پہنچائیں گے۔ حفاظتی انتظامات پختہ ہوں گے۔ اس کے علاوہ بیت الخلاء، غسل خانہ، صاف ستھرائی و عارضی ہیلتھ سینٹر وغیرہ جیسے کئی معاملوں پر تفصیلی گفتگو ہوئی۔