بھلے ہی بہار میں تیجسوی یادو کے وزیراعلیٰ بننے کی امیدوں کو جھٹکا لگا ہو لیکن انہوں کوشش بھرپور کی۔ آج ہم آپ کو تیجسوی کے کرکٹ کے میدان سے سیاسی میدان تک کے سفر کے بارے میں بتائیں گے۔
بہار کے 31 سالہ نوجوان رہنما تیجسوی یادو کو سیاسی میدان میں اپنی شناخت بنانے سے پہلے کرکٹ کے میدان میں بھرپور کوشش کرتے دیکھا گیا۔ دراصل سیاسی کھلاڑی بننے سے پہلے تیجسوی یادو کرکٹ کے میدان پر اپنے جوہر دکھایا کرتے تھے۔
تیجسوی یادو نے دہلی پبلک اسکول متُھرا روڈ سے تعلیم حاصل کی ہے۔ دوران تعلیم یہ لمبے بال رکھتے تھے اور کرکٹ کے تئیں ان کی لگن کو دیکھ کر لوگ یہی سوچتے تھے کہ تیجسوی کرکٹ میں ضرور بڑا نام کریں گے اور اسکول سمیت ملک کا نام بھی روشن کریں گے لیکن ان کی یہ خواہش ادھوری ہی رہی اور تیجسوی یادو 9 ویں جماعت تک ہی تعلیم حاصل کرسکے لیکن انہوں نے کرکٹ کھیلنا جاری رکھا۔
تیجسوی یادو بلے بازی کے علاوہ گیند بازی بھی کرتے تھے اور مڈل آرڈر کے بلے باز تھے۔ گیند کو بہترین انداز میں سوئنگ کرانے میں انہیں مہارت حاصل تھی۔
اگر بات آئی پی ایل کی کریں تو تیجسوی یادو نے چار سیزن (2008-12) میں دہلی ڈیئر ڈیولز اسکواڈ میں تھے لیکن انھیں کبھی بھی پلیئنگ الیون میں شامل نہیں کیا گیا اور اس طرح وہ کوئی بھی میچ کھیلے بغیر آئی پی ایل سے رخصت ہوگئے۔
آئی پی ایل کے ایک بھی میچ میں تیجسوی یادو کو موقع نہ ملنے پر ان کے والد اور بہار کے سابق وزیر اعلیٰ لالو پرساد یادو نے کافی طنز کیا تھا۔
حالانکہ تیجسوی یادو نے فرسٹ کلاس کرکٹ کھیلی ہے۔ انہیں یہ موقع جھارکھنڈ کی ٹیم میں سنہ 2009 میں ملا تھا جب وہ رانچی میں رنجی ٹرافی میں ودربھ کے خلاف کھیلنے اترے تھے۔ لیکن وہ اپنی پہلی اننگز میں صرف 1 رن ہی بنا سکے اور ایل بی ڈبلیو ہوگئے جبکہ گیند بازی کے دوران تیجسوی یادو نے ودربھ کی پہلی اننگز میں 5 اوورز میں 17 رنز دیئے لیکن انہیں وکٹ نہیں ملی تھی اور دوسری اننگ میں تیجسوی نے 19 رنز بنائے تھے۔
اس کے علاوہ تیجسوی نے لسٹ اے کے دو میچ (ڈومیسٹک ون ڈے) اور چار ٹی 20 میچ کھیلے ہیں۔
سنہ 2010 میں آئی پی ایل کے کھلاڑی کی حیثیت سے معاہدہ کرنے کے باوجود تیجسوی نے بہار اسمبلی انتخابات میں اپنے والد کے لیے انتخابی مہم میں شرکت کی تھی جس کے بعد یہ ظاہر ہوگیا تھا کہ لالو پرساد یادو اپنے بیٹے کو سیاست میں لانے کی کوشش کر رہے ہیں۔
