ریاست بہار کے گیا میں واقع مگدھ یونیورسٹی کے وائس چانسلر پروفیسر راجندر پرساد کی رہائش گاہ اور دفتر پر اسپیشل ویجلینس یونٹ کی طرف سے چھاپے ماری کی جارہی ہے۔ وائس چانسلر پر یونیورسٹی میں بڑے پیمانے پر بدعنوانی کا الزام ہے۔
وائس چانسلر کے گھر کے اندر کسی کو آنے جانے کی اجازت نہیں ہے۔ بڑی تعداد میں پولیس فورس تعیناتی کی گئی ہے۔ وائس چانسلر کے خلاف کیس درج کیا گیا اور ان کے کئی ٹھکانوں پر تلاشی مہم جاری ہے۔
آج صبح سے ہی وائس چانسلر کی سرکاری رہائش گاہ اور دوسری جگہوں پر تلاشی لی جارہی ہے۔ اس کے پہلے ویجلینس کورٹ نے سرچ وارنٹ جاری کیا تھا اس کے بعد یہ تلاشی لی جارہی ہے۔
بہار اسپیشل ویجلینس یونٹ کے ڈی جی نیئر حسنین خان خود اس کی مانیٹرنگ کررہے ہیں۔ حالانکہ اطلاع کے مطابق ڈی جی نیئر حسنین خان یہاں موجود نہیں ہیں۔ ایس پی رینک کے افسر اس چھاپے ماری کی قیادت کررہے ہیں، ساتھ ہی کئی ڈی ایس پی اور مقامی تھانہ رام پور کی پولیس بھی موجود ہے۔
ایس ایس پی ادتیہ کمار نے اس کی تصدیق کرتے ہوئے کہا کہ 'چھاپے ماری اسپیشل ویجلینس یونٹ کی طرف سے کی جارہی ہے حالانکہ انہوں نے مزید تفصیلات بتانے سے گریز کیا اور کہا کہ جانچ کے بعد متعلقہ حکام اس کی تفصیل بتائیں گے۔'
یہ بھی پڑھیں:
واضح رہے کہ اسپیشل ویجیلینس یونٹ نے 2/ 2021 کیس درج کیا ہے جس میں مگدھ یونیورسٹی کے وائس چانسلر راجندر پرساد سنگھ ان کے پرائیویٹ سیکریٹری سبودھ کمار اور ایک سابق گرافکس اینڈ آفس پرنٹر کے مالک اوم پرکاش جو ویر کنور سنگھ یونیورسٹی آرہ کے مالی آفیسر ہیں۔ وہیں جتندر کمار رجسٹرار پاٹلی پترا یونیورسٹی اور دوسرے کے خلاف دفعہ 120، 420 بی اور دیگر آئی پی سی دفعات درج کی گئی تھی۔
