وزیر اعظم مودی نے آج ٹویٹر پر بتایا کہ بہار اور اترپردیش کے کچھ اضلاع میں بھاری بارش اور آسمانی بجلی گرنے سے کئی افراد کی موت کی خبر سن کر کافی دکھ ہوا۔
ریاستی حکومت مستعدی کے ساتھ راحت اور بچاؤ کے کام میں مصروف ہے۔
اس تباہی میں جن لوگوں کو اپنی جان گنوانی پڑی ہے میں ان کے اہل خانہ کے تئیں اپنی تعزیت کا اظہار کرتا ہوں۔
ریاست بہار کے وزیر اعلیٰ نتیش کمار نے بھی آسمانی بجلی سے ہلاک ہوئے افراد کے تئیں گہرے صدمے کا اظہار کیا ہے اور ہلاک ہوئے افراد کے ورثاء کو چار۔ چار لاکھ روپے معاوضہ دینے کی ہدایت دی ہے۔
وزیر خوراک رام ولاس پاسوان نے بھی بہار اور اترپردیش میں آسمانی بجلی گرنے سے ہلاک ہوئے افراد کے تئیں تعزیت کا اظہار کیا ہے۔
بی جے پی کے قومی ترجمان سید شہنواز حسین نے بھی بہار میں آسمانی بجلی گرنے سے 83 افراد کی موت پر غم کا اظہار کرتے ہوئے تعزیت پیش کی ہے۔
خیال رہے کہ بہار میں مختلف مقامات پر بھاری بارش اور آسمانی بجلی گرنے سے 83 افراد کی موت جبکہ اترپردیش میں کئی جگہوں پر اسی طرح کے واقعات میں دس لوگوں کی موت ہوگئی ہے۔
