مرکزی حکومت کے ذریعے لائے گئے تین نئے زرعی قوانین کی مخالفت میں کل یعنی 8 دسمبر کو بھارتیہ کسان یونین کی جانب سے بھارت بند کا اعلان کیا گیا ہے۔ اس بند کی حمایت کرتے ہوئے تمام سیاسی و سماجی تنظیموں نے کہا کہ حکومت زرعی قانون کو فوراً واپس لے۔
ایک طرف جہاں دہلی کے سرحد پر ہریانہ و پنجاب کے کسان اس قانون کو واپس لیے جانے پر بضد ہیں اور احتجاج کر رہے ہیں۔ وہیں، اب دہلی کے علاوہ دوسری ریاستوں کے عام و خاص سبھی کسانوں کے اس تحریک سے جڑ رہے ہیں اور ان کی حمایت میں شانہ بشانہ کھڑے ہیں۔
اسی ضمن میں آج دیر شب ریاست بہار کے ضلع ارریہ کے برما سیل سے چاندنی چوک تک مختلف سیاسی پارٹیوں کی جانب سے ایک مشعل جلوس نکال کر تمام لوگوں سے کل بھارت بند کو کامیاب کرنے کی اپیل کی گئی۔ اس مشعل جلوس میں کانگریس، آر جے ڈی، سی پی آئی، سی پی آئی ایم ایل کے کارکنان شریک ہوئے۔ متحدہ بھارت خصوصاً بہار کے تمام اضلاع میں 'چکہ جام' کا اعلان کرتے ہوئے شہر کے مختلف چوک چوراہوں پر لوگوں سے اس بندی میں شامل ہونے کی اپیل کی گئی ہے۔
