مظفر پور: لیچی کے باغ میں متعدد کووں کی اچانک موت

لیچی کے باغات میں بہت سے کوے مردہ پائے گئے ہیں۔ محکمہ مویشی پروری کی ٹیم جانچ کے لیے مردہ کووں کا نمونہ اپنے ساتھ لے گئی ہے۔ تحقیقات کے بعد ہی کووں کی موت کی وجہ معلوم ہو سکے گی۔

بہار کے ضلع مظفر پور کے کرجا تھانہ کے ریپورہ میں لیچی باغ میں ایک درجن سے زائد کووں کی اچانک موت ہوگئی۔ اس واقعے کے بعد سے آس پاس کے علاقے میں دہشت پیدا ہوگئی ہے۔ مقامی لوگ برڈ فلو کے خدشے سے خوفزدہ ہیں۔

مقامی لوگوں نے اس کی اطلاع محکمہ مویشی پروری کے آفیسر کو دی۔ لیچی کے باغات میں کووں کو شور مچاتے دیکھا گیا تھا۔ مقامی لوگوں کے مطابق ایک درجن سے زیادہ کووے تڑپ رہے تھے اور دیکھتے ہی دیکھتے بہت سے کووے مر گئے۔

اس معاملے کے بارے میں معلومات ملنے کے بعد محکمہ مویشی پروی کی ٹیم نے تفتیش شروع کردی ہے۔ ٹیم نے مردہ کوے کا نمونہ لے کر جانچ کے لیے پٹنہ بھیج دیا ہے۔ وہیں، برڈ فلو کے خدشات کے پیش نظر آس پاس کے متعدد پولٹری فارمس سے مرغیوں کے نمونے بھی جانچ کے لیے بھیج دیئے گئے ہیں۔