بہار کے بیگوسرائے ضلع میں زیرو مائل آﺅٹ پوسٹ( او پی) علاقہ کے پپرور میں پولیس نے 120 کلوگرام گانجہ اور کثیر مقدار میں دیسی اور انگریزی شراب کے ساتھ دو اسمگلروں کو گرفتار کرلیا۔
پولیس ذرائع نے بتایا کہ زیرو مائل او پی تھانہ علاقہ کے پپرور میں کثیر مقدار میں گانجہ اور شراب کاروبار کی اطلاع ملی تھی۔ اس اطلاع کی بنیاد پر محمد شمشاد عالم کے گھر پر کل رات چھاپے ماری کی گئی جس میں 120 کلو گانجہ اور 46 بوتل انگریزی شراب برآمد کی گئی۔ اس معاملے میں منشیات کاروباری محمد شمشاد عالم کو گرفتار کرلیا گیا ہے اور تفتیش کی جارہی ہے۔ برآمد گانجہ کی قیمت دس لاکھ روپے سے زائد بتائی جاتی ہے۔
وہیں دوسری جانب زیرو مائل پولیس نے منوج شاہ کے گھر میں شراب رکھے جانے کی خفیہ اطلاع پر چھاپے ماری کی۔ اس کاروائی میں 27 بوتل انگریزی شراب اور 110 بوتل دیسی شراب برآمد کی گئی ہے۔ اس معاملے میں منوج شاہ کے بیٹے گوتم کمار کو گرفتار کیا گیا ہے۔
