اس موقع پر کانفرنس کی صدارت کر رہے دلت مسلم ایکتا منچ کے ضلع صدر حاجی امتیاز انصاری نے دلت مسلم اتحاد پر زور دے کر کہا کہ ملک میں بھائی چارہ کے ماحول کو بگاڑنے کی منظم سازش کی جارہی ہے۔
انہوں نے کہا کہ 'ان حالات میں ملک کے مستقبل کو محفوظ بنانے کے لیے دلت مسلم اتحاد کو بڑھاوا دینا چاہیے'۔
انہوں نے اس عزم کا بھی اعادہ کیا کہ دلت۔ مسلم ایکتا منچ بہار کے ہر ضلع میں دلتوں اور مسلمانوں سے مل کر اتحاد قائم کرنے کی کوشش کرے گا۔تاکہ جو لوگ ملک میں نفرت کا بیج بو کر ملک کو توڑنے کی کوشش کر رہے ہیں انہیں منہ توڑ جواب دیا جائے۔
اس موقع پر مقررین نے ملک میں ہجومی تشدد کے بڑھتے واقعات پر تشویش کا اظہار کیا اور کہا کہ 'جو لوگ رام کے نام پر لوگوں کا قتل کر رہے ہیں وہ قطعی رام کے ماننے والے نہیں ہیں'۔
کانفرنس میں شامل سبھی مقررین نے لوگوں سے معاشرے میں امن و امان عام کرنے اور ملک کی ترقی میں اپنا کردار ادا کرنے کی اپیل کی۔
اس موقع پر ناگرک سیوا سمیتی کے صدر رضوان خان، عثمان انصاری، نسیم انصاری، شبیر انصاری، ہارون رشید، پروفیسر بلکشن روی داس، رویندر رجک، شیلیندر ساہو، وغیرہ بھی موجود تھے۔
