'سوپور میں ہلاک عسکریت پسند لشکر طیبہ سے وابستہ تھے'

ڈی آئی جی شمالی کشمیر نے کہا کہ یہ تینوں عسکریت پسند بڑی کاروائی کرنے کی کوشش میں مصروف تھے اور ماڈل ٹاؤن سوپور میں ہوئے عسکری حملہ میں بھی ان کا ہی ہاتھ تھا۔

جموں و کشمیر کے سیکیورٹی ذرائع نے کہا ہے کہ شمالی کشمیر کے ضلع بارہمولہ کے رفیع آباد کے ریبن نامی گاؤں میں گزشتہ روز تین لشکر طیبہ سے وابستہ عسکریت پسندوں کو ہلاک کردیا گیا اور ان میں سے دو کی پہچان پاکستان سے تعلق رکھنے والے ابو عثمان اور ڈاکڑ سیف اللہ کے طور ہوئی ہے جبکہ تیسرے عسکریت پسند کی شناخت ابھی کی جا رہی ہے۔

اس سلسلے میں آج قصبہ سوپور میں ڈی آئی جی شمالی کشمیر محمد سلیمان چودھری، 5 سیکٹر آر آر کے کمانڈنگ افسر وویک نارنگ اور ایس ایس پی سوپور جاوید اقبال نے ایک پریس کانفرنس کی جس میں انہوں نے تصادم کے حوالے سے تفصیلات فراہم کیں۔

ڈی ائی جی شمالی کشمیر نے کہا کہ یہ تینوں عسکریت پسند بڑی کاروائی کرنے کی کوشش میں تھے اور ماڈل ٹاؤن سوپور میں ہوئے عسکری حملہ میں بھی ان کا ہی ہاتھ تھا۔ انہوں نے کہا سیکیورٹی فورسز کی بروقت کاروائی نے ان کے منصوبوں کو ناکام بنا دیا۔

انہوں نے کہا عسکریت پسندوں کے قبضے سے تین اے کے 47، میگزین، تین پاؤچ، ایک سو چالیس گولیاں، ایک بوٹ اور گھڑی بھی برآمد کی گئی ہے۔