سینئر کانگریس لیڈر اور سابق رکن پارلیمان سیف الدین سوز اپنی رہائی کے چند روز بعد مرکز کے زیر انتظام جموں و کشمیر کے لیفٹیننٹ گورنر منوج سنہا سے ملاقات کی۔
سنہا سے ملاقات کے دوران انہوں نے شوپیاں معاملے کی تحقیقات اور عوامی مسائل کو حل کرنے کی بات کی۔لیفٹیننٹ گورنر سے ہوئی ملاقات کی تفصیلات فراہم کرتے ہوئے سوز کا کہنا تھا کہ 'میں گزشتہ شام ان سے ملا اور کئی مسائل پر تفصیلی گفتگو کی۔
میں نے ان سے کہا کہ عالمی وبا کرونا وائرس کی وجہ سے یہاں کے بے روزگار کافی متاثر ہوئے ہیں۔ اسی لئے انہیں مالی معاونت کی ضرورت ہے۔'
یہ بھی پڑھیں: سڑک نہ ہونے سے عوام پریشان
ان کا مزید کہنا تھا کہ 'لیفٹیننٹ گورنر نے مجھے یقین دلایا ہے کہ تمام مسائل کا جلد ازالہ کیا جائے گا۔ میں نے شوپیاں کے معاملے پر بھی بات کی۔
ان کے جواب سے مطمئن ہوں اور مجھے امید ہے کہ آنے والے دنوں میں عوام کے حق میں کافی کام ہونے والا ہے۔'سوز کو اکیس تاریخ کو ایک سال بعد رہا کیا گیا تھا۔ وہ گذشتہ برس پانچ اگست سے اپنے گھر میں زیر حراست تھے۔
