شمالی کشمیر کے ضلع بانڈی پورہ کے سوناواری علاقے میں لوگوں نے پنچایت حلقہ رکھ شلوت کو سمبل بلاک سے نکال کر نوگام بلاک سے منسلک کرنے کے انتظامیہ کے فیصلے کے خلاف ایک احتجاجی مظاہرہ کیا۔
رکھ شلوت کی پنچایت باڈی اور دیگر رہائشیوں نے اس فیصلے کے خلاف احتجاج کرتے ہوئے اسے علاقے کے لوگوں کے ساتھ زیادتی کرنے سے تعبیر کیا۔
احتجاج میں شامل لوگوں کا کہنا تھا کہ وہ اس سے قبل سمبل بلاک سے وابستہ تھے اور وہی بلاک ان کے لئے موزوں اور مناسب تھا، لیکن نئی ڈلی لمٹیشن پالیسی کے تحت انہیں بلاک نوگام سے منسلک کیا جا رہا ہے جو مذکورہ حلقے سے کافی دوری کے فاصلے پر واقع ہے۔
مقامی لوگوں کا کہنا ہے کہ اگر انہیں نوگام بلاک کے ساتھ منسلک کیا گیا تو انہیں مختلف دفتری معاملات میں گوناگوں مشکلات کا سامنا کرنا پڑے گا کیونکہ نوگام بلاک پنچایت حلقہ رکھ شلوت سے کافی دور ہے جبکہ جس بلاک کے ساتھ وہ اس سے قبل منسلک تھے وہ ایک سے ڈیڑھ کلومیٹر کے فاصلے پر پڑتا ہے۔
مقامی لوگوں کا مطالبہ ہے کہ انہیں نوگام کے بجائے سمبل بلاک کے ساتھ ہی منسلک رکھا جائے کیونکہ سمبل بلاک ہی ان کے لئے مناسب اور نزدیک ہے۔
پنچایت باڈی نے احتجاج کے دوران انتظامیہ کو متنبہ کیا کہ اگر ان کا یہ مطالبہ پورا نہیں کیا گیا تو وہ نہ صرف پنچایت کمیٹی سے مستعفی ہونگے بلکہ اگلے پنچایتی انتخابات کا مکمل بائیکاٹ کریں گے۔
