ضلع کلکٹر وی ونئے چند کے مطابق دو دن قبل اس کمپنی سے گیس کے اخراج کی وجہ سے گیارہ افراد ہلاک اور دیگر ایک ہزار افراد متاثر ہوئے تھے۔ انہوں نے کہا کہ حادثہ کے بعد ماہرین طلب کرلیا گیا ہے جو گیس کے اثرات کو ختم کرنے میں مصروف ہیں جبکہ 60 فیصد اثر کو ختم کردیا گیا ہے مزید چالیس فیصد اثر کو بھی بہت جلد ختم کردیا جائے گا۔
کمپنی کی جانب سے جاری کردہ بیان میں بتایا گیا ہے کہ پلانٹ میں سب کچھ ٹھیک ہے اور اسٹائرین گیس کا دوبارہ اخراج نہیں ہوا ہے جبکہ کمپنی تمام تر احتیاطی اقدامات کر رہی ہے۔
وزیراعلیٰ وائی ایس جگن موہن ریڈی کی جانب سے مسلسل حالات کا جائزہ لیا جارہا ہے۔ چیف سکریٹری نیلم ساہنے، کلکٹر وشاکھاپٹنم ونئے چندر اور پولیس کمشنر آر کے مینا کے ساتھ جگن موہن ریڈی نے ویڈیو کانفرنس منعقد کی اور حالات کا جائزہ لیا۔
جگن موہن ریڈی نے عہدیداروں کو عاجلانہ طور پر تحقیقاتی رپورٹ تیار کرنے کی ہدایت دی اور ایک جامع حکمت عملی کے تحت اس بات کو یقینی بنایا جائے کہ مستقبل میں اس قسم کے واقعات کا اعادہ نہ ہوسکے۔
انہوں نے عہدیداروں کو ایسے فیکٹریز کی نشاندہی کرنے کی ہدایت دی جو انسانی جانوں کےلیے خطرہ بن سکتے ہیں جبکہ انہوں نے ایسی فیکٹریوں کو آبادی سے دور منتقل کرنے کی بھی ہدایت دی۔
