ضلع اننت ناگ کی سکھ برادری سے وابستہ ایک وفد نے لیفٹیننٹ گورنر منوج سنہا کا شکریہ ادا کیا۔ انہوں نے کہا کہ پہلی بار ان کی مختلف مانگوں کو غور سے سنا گیا اور تمام جائز مانگوں کو حل کرنے کی یقین دہانی کی گئی جس پر وہ ایل جی کے مشکور ہیں۔
ای ٹی وی بھارت سے بات کرتے ہوئے وفد کے لیڈر گیانی راجندر سنگھ نے کہا کہ جموں کشمیر میں سکھ طبقہ سے وابستہ افراد کو اقلیت میں ہونے کے باوجود ابھی تک اقلیت کا درجہ نہیں دیا گیا لہذا ان کی مانگ ہے کہ انہیں اقلیت کے زمرے میں لایا جائے۔
مائیگرنٹ پنڈتوں اور پہاڑی طبقہ کی طرح انہیں نوکریوں میں ریزرویشن دی جائے۔ وہیں کشمیر یونیورسٹی میں مہاراجہ ہری سنگھ کے نام پر سکھوں کے لئے ایک علیحدہ کرسی رکھی جائے۔
گیانی سنگھ نے کہا کہ سات فروری کو انہوں نے ایل جے کے سامنے یہ تمام جائز اور دیرینہ مطالبات رکھے جس پر ایل جی کا مثبت جواب ملا جو ایک خوش آئند بات ہے۔
انہوں نے کہا کہ انہیں یقین ہے کہ لیفٹیننٹ گورنر کی جانب سے ان کے تمام دیرینہ مطالبات کو ترجیحی بنیادوں پر حل کیا جائے گا۔
