جنوبی کشمیر کے بجبہاڑہ علاقے میں میونسپل کمیٹی نے اگرچہ کئی اہم رابطہ سڑکوں پر سے برف ہٹائی ہے، تاہم کئی علاقوں سے شکایتیں موصول ہو رہی ہیں کہ بلدیہ کا عملہ کئی اندرونی سڑکوں سے برف ہٹانے میں سستی کا مظاہرہ کر رہا ہے۔
قصبہ بیجبہاڈہ کی نیو کالونی کے لوگوں نے میونسپلٹی پر الزام عائد کرتے ہوئے کہا کہ انہوں نے برف ہٹانے کے حوالے سے کئی مرتبہ میونسپلٹی حکام سے رابطہ کیا، تاہم کمیٹی کی جانب سے ابھی تک کوئی کارروائی عمل میں نہیں لائی گئی ہے۔
انہوں نے کہا کہ سڑکوں پر برف جمع ہونے کے باعث لوگوں کو سخت مشکلات سے دو چار ہونا پڑتا ہے۔
مقامی لوگوں کا کہنا ہے کہ انتظامیہ کی جانب سے اگرچہ رابطہ سڑکوں سے پہلے ہی برف ہٹائی گئی تھی، لیکن لنک روڈز پر برف نہ ہٹانے کے سبب گلی کوچوں میں پھسلن پیدا ہو گئی ہے اور لوگ گھروں میں ہی محصور ہو کر رہ گئے ہیں۔
اس سلسلے میں جب ای ٹی وی بھارت کے نمائندے نے فون پر یہ معاملہ میونسپل کمیٹی کے ایگزیکیٹوں آفیسر کی نوٹس میں لایا، تو اُنہوں نے کہا کہ کمیٹی کی جانب سے جلد ہی کارروائی عمل میں لاکر کالونی سے برف ہٹائے جانے کا کام مکمل کیا جائے گا۔
