ضلع ترقیاتی کمشنر اننت ناگ ڈاکٹر پیوش سنگلا نے ڈی سی آفس میں ہفتہ کو منعقدہ ایک میٹنگ کے دوران سرکاری افسران کو ہدایت دی کہ وہ عدالتی معاملات، ٹھیکہ داری اور معاوضے سے جڑے تمام معاملات کو فوری طور حل کریں اور ترقیاتی منصوبوں پر جاری کام میں سرعت لائیں تاکہ مقررہ مدت کے اندر تمام ترقیاتی منصوبوں کو مکمل کیا جائے۔
میٹنگ کے دوران ڈی سی اننت ناگ نے محکمہ بجلی کے افسران کے ساتھ ایک جائزہ میٹنگ کے دوران افسران کو ہدایت دیتے ہوئے کہا کہ وہ ماہ رمضان کے متبرک ایام کے پیش نظر بجلی تخفیف کو کم کریں اور خاص کر افطاری اور سحری کے اوقات میں بجلی کی معقول سپلائی کو یقینی بنائیں، تاکہ لوگوں کو مشکلات کا سامنا نہ کرنا پڑے۔
انہوں نے متعلقہ محکمہ کو ضلع انتظامیہ کی جانب سے مکمل تعاون فراہم کرتے ہوئے محکمہ مال کے افسران کو ہدایت دی کہ وہ اس سلسلہ میں بجلی محکمہ کی بھرپور مدد کریں۔
اس میٹنگ میں محکمہ بجلی کے ایگزیکٹو انجینئر، محکمہ مال کے افسران کے علاوہ تحصیلدار صاحبان بھی موجود رہے۔
