اننت ناگ: ماس پروموشن کے لیے طلبا کا احتجاج

جنوبی کشمیر کے ضلع اننت ناگ میں گیارہویں جماعت کے طلبا و طالبات نے آج احتجاج کرتے ہوئے ماس پروموشن کا مطالبہ کیا۔

تفصیلات کے مطابق ضلع اننت ناگ میں گیارہویں جماعت کے طلبا و طالبات نے آج ماس پروموشن کی مانگ کو لیکر لال چوک اننت ناگ میں احتجاجی مظاہرہ کیا۔

مظاہرہ کر رہے طالب علموں نے ماس پرموشن کرائے جانے کے حق میں جم کر نعرے بازی کی اور کہا کہ رواں برس کشمیر کے حالات اور کورونا کے باعث ہونے والے لاک ڈاؤن کی وجہ سے وہ امتحانات کی تیاری نہیں کر پائے۔ اس لیے ہم انتظامیہ سے اپیل کرتے ہیں کہ گیارہویں جماعت میں بنا امتحانات کے ماس پروموشن دی جائے۔

انہوں نے کہا کہ کورونا وائرس اور اس کے بعد نافذ لاک ڈاؤن کے دوران انکا تدریسی سیشن ضائع ہوگیا۔ جبکہ 2 جی انٹرنیٹ سروس کی وجہ سے آن لائن کلاسز کے ذریعے بھی انہیں کوئی خاص فائدہ نہیں پہنچا ہے۔

طالب علموں نے ایل جی سے اپیل کی کہ اس حوالے سے نظر ثانی کرکے انکا تعلیمی سال بچایا جائے۔