پاکستان نے زمبابوے کو پہلی اننگز میں 132 رن پر سمیٹ کر اسے فالو آن کرنے پر مجبور کیا تھا۔ پاکستان نے اپنی پہلی اننگز آٹھ وکٹوں کے نقصان پر 510 رن بناکر ڈکلیئر کی تھی۔
زمبابوے پہلی اننگز میں پاکستان کے اسکور سے 378 رن سے پیچھے ہوگیا تھا اور اسے فالو آن کے لیے مجبور ہونا پڑا تھا اور اس کی دوسری اننگز 68 ویں اوور میں 231 رن پر سمٹ گئی۔
واضح رہے کہ پاکستان نے پہلا ٹیسٹ میچ بھی اننگز اور 116 رن سے جیتا تھا۔
میچ کے چوتھے روز زمبابوے نے بیٹنگ کا آغاز کیا تو اسے پہلی اننگز کے نقصان کو پورا کرنے کے لیے مزید 158 رنز درکار تھے۔ تاہم اس کی آخری جوڑی مجموعی اسکور میں صرف 11 رنز کا اضافہ کر سکی اور پوری ٹیم دوسری اننگز میں 231 رنز پر ڈھیر ہوگئی۔
لیوک جونگوے کو شاہین آفریدی نے 37 رن پر آؤٹ کرکے اپنا پانچواں وکٹ لیا اور میزبان ٹیم کی دوسری اننگز 231 رن پر سمیٹ دی۔ بلیسنگ مزربانی 24 گیندوں میں چار رن بناکر ناٹ آوٹ رہے۔ جونگوے نے 70 گیندوں میں سات چوکوں کی مدد سے 37 رن بنائے۔ دوسری اننگز میں نعمان علی اور شاہین آفریدی نے میزبان ٹیم کی بیٹنگ لائن کو تہس نہس کر دیااور پانچ پانچ وکٹیں حاصل کیں۔
پاکستان کی پہلی اننگز میں ڈبل سنچری بنانے والے عابد علی کو پلیئر آف دی میچ کا ایوارڈ جبکہ حسن علی کو پلیئر آف دی سیریز کے ایوارڈ سے نوازا گیا۔
پاکستان : پہلی اننگ: 8 وکٹوں کے نقصان پر 510 رنز۔ اننگز ڈکلیئر
زمبابوے : پہلی اننگ 132 اور دوسری اننگ 231 رن
