جنوبی افریقہ کے آل راونڈر کرس مورس کو راجستھان رائلز نے آئی پی ایل نیلامی میں 16 کروڑ 25 لاکھ روپے میں خرید کر سب کو حیران کر دیا۔
خطیر رقم میں راجستھان رائلز کا حصہ بننے والے کرس مورس آئی پی ایل نیلامی کی تاریخ میں سب سے مہنگے کھلاڑی بن گئے۔
اس کے علاوہ آسٹریلیا کے آل راونڈر گلین میکسویل کو رائل چیلنجرز بنگلور نے 14 کروڑ 25 لاکھ روپے اور آسٹریلیا کے ہی تیز گیندباز جے رچرڈسن کو پنجاب کنگز نے 14 کروڑ روپئے میں خریدا۔
کرس مورس نے بھارت کے یوراج سنگھ کا ریکارڈ توڑا جنہیں دہلی ڈیئر ڈیولس(اب دہلی کیپِٹلز) نے 2015 کی نیلامی میں 16 کروڑ میں خریدا تھا۔
مورس آئی پی ایل میں دوسرے مہنگے ترین کھلاڑی بن گئے ہیں۔ وراٹ کو آئی پی ایل کے ایک سیزن کے لیے رائل چیلنجرز بنگلور فرنچائزی 17 کروڑ روپے دیتی ہے۔
راجستھان ٹیم نے کرس مورس کو خریدنے کے لیے اس وقت دوڑ میں چھلانگ لگائی جب ان کی قیمت 10 کروڑ 25 لاکھ کروڑ روپے پہنچ چکی تھی اور ممبئی انڈینز مورس کو خریدنے کے قریب تھی لیکن پنجاب نے پھر 13.50 کروڑ کی بولی لگائی اور بولی 16 کروڑ پہنچنے کے بعد پنجاب نے اپنے ہاتھ کھینچ لئے۔
کرس مورس کا بیس پرائز 75 لاکھ روپے تھا۔ راجستھان نے اپنے 34 کروڑ 85 لاکھ روپے کے پرس میں سے 16 کروڑ 25 لاکھ روپے مورس کو خریدنے پر خرچ کردئے۔
نیلامی میں رائل چیلینجرز بنگلور ٹیم نے آسٹریلیائی آل راؤنڈر گلین میکسویل کو 14 کروڑ 25 لاکھ روپے میں خریدا لیکن اس کے فوراً بعد ہی راجستھان رائلز نے مورس کو 16.25 کروڑ میں خریدا۔
یہ بھی پڑھیں: شاہ رخ خان کو پنجاب نے 5.25 کروڑ میں خریدا
جنوبی افریقہ کے 33 سالہ کرس مورس 2015 کے سیزن میں راجستھان ٹیم کا حصہ تھے اور انہوں نے 11 میچوں میں 311 رنز بنانے کے علاوہ 13 وکٹیں بھی حاصل کی تھیں۔
انہوں نے 70 آئی پی ایل میچوں میں 157.88 کے اسٹرائک ریٹ سے 551 رنز بنائے ہیں اور 7.81 کی اکانومی ریٹ سے 80 وکٹیں بھی حاصل کیں۔ وہ گذشتہ سیزن میں بنگلور ٹیم کا حصہ تھے لیکن پیٹھ میں چوٹ کی وجہ سے 9 میچ ہی کھیل سکے تھے جن میں انہوں نے 11 وکٹیں حاصل کیں۔
کرس مورس کی گزشتہ سال کی قیمت 6 کروڑ 25 لاکھ روپے تھی جس میں 10 کروڑ روپے کا اضافہ ہوا ہے۔
اس کے علاوہ گلین میکسویل کا پچھلا سیزن مایوس کن رہا تھا اور انہوں نے 13 میچوں میں محض 108 رنز بنائے تھے جس میں انہوں نے ایک بھی چھکہ نہیں لگایا تھا جبکہ آئی پی ایل کو بڑے شاٹس کا ہی کھیل مانا جاتا ہے۔
خراب اور مایوس کن کارکردگی کی وجہ سے پنجاب ٹیم نے اس سیزن میں میکسویل کو ریلیز کردیا تھا۔ وہ دو کروڑ روپے کی بیس پرائز کے ساتھ نیلامی میں اترے تھے اور انہیں اس نیلامی میں بھاری قیمت ملی ہے۔
رائل چیلینجرز بنگلور نے میکسویل کو خریدنے کے لیے چنئی سُپر کنگز کے ساتھ بھرپور مقابلہ کیا اور انہیں حاصل کیا۔ میکسویل کی یہ قیمت ان کے گزشتہ سیزن سے تقریباً چار کروڑ زیادہ ہے۔ میکسویل نے گزشتہ سیزن پنجاب کنگز کی طرف سے کھیلا تھا اس وقت انہیں 10 کروڑ 75 لاکھ روپے ملے تھے۔
اس کے علاوہ جے رچرڈسن کو نیلامی میں پنجاب کنگز ٹیم نے 14 کروڑ روپے کی قیمت پر خریدا اور اس طرح رچرڈسن اس نیلامی میں تیسرے مہنگے کھلاڑی بنے۔
چنئی سُپر کنگز انگلینڈ کے آف اسپنر آل راؤنڈر معین کو خریدنے میں کامیاب رہی اور انہیں 7کروڑ روپے کے عوض اسکواڈ میں شامل کیا۔ معین علی کا بیس پرائز 2 کروڑ روپے تھا۔
اس درمیان بھارتی کھلاڑیوں میں کرشنپا گوتم نے نئی تاریخ رقم کردی۔ وہ آئی پی ایل کی تاریخ کے سب سے مہنگے ان کیپڈ کھلاڑی بن گئے۔ چنئی سُپر کنگز نے گوتم کو 9 کروڑ 25 لاکھ روپے کی بولی کے ساتھ خریدا۔ وہ اس نیلامی میں اب تک کے سب سے مہنگے بھارتی کھلاڑی بھی بن گئے ہیں۔
یہ بھی پڑھیں: جانئے مجیب، قیس احمد، ثاقب، معین اور مستفیض کو کن فرینچائیزیز نے خریدا
نیلامی میں چنئی کے پاس 22 کروڑ 90 لاکھ روپے کا پرس تھا جس میں سے اس نے معین اور گوتم کو خریدنے پر 16 کروڑ 25 لاکھ روپے خرچ کئے۔
نیلامی کے پہلے راؤنڈ میں فروخت ہونے والے واحد کھلاڑی شیوم دوبے تھے جنہیں راجستھان رائلز نے 4 کروڑ 40 لاکھ کروڑ میں خریدا تھا لیکن اس کے بعد پنجاب نے تمل ناڈو کے آف اسپنر شاہ رخ خان کو 5 کروڑ 25 لاکھ روپے میں خرید لیا۔ پنجاب نے آسٹریلیا کے نوجوان تیز گیند باز ریلے میریڈتھ کو 8 کروڑ روپے میں خریدا۔
نیلامی میں حیرت انگیز طور پر انگلینڈ کے بلے باز ڈیوڈ ملان اور آسٹریلیائی بلے باز اسٹیو اسمتھ کو زیادہ قیمت نہیں ملی۔ اسمتھ کا بیس پرائز 2 کروڑ روپے تھا جبکہ دہلی کیپِٹلس نے انہیں 2 کروڑ 20 لاکھ روپے میں خریدا جبکہ ملان کو پنجاب نے ڈیڑھ کروڑ میں خریدا۔
راجستھان نے بنگلہ دیش کے مستفیض الرحمن کو ایک کروڑ اور چیتن سکریا کو ایک کروڑ 20 لاکھ روپے میں خریدا۔ ممبئی انڈینز نے بھارتی لیگ اسپنر پیوش چاولہ کو 2 کروڑ 40 لاکھ، ناتھن کولٹر نائل کو 5 کروڑ اور ایڈم ملنے کو 3 کروڑ 20 لاکھ روپے میں خریدا جبکہ دہلی کیپیٹلز نے تیز گیند باز اُمیش یادو کو ایک کروڑ میں خریدا۔
کولکاتا نائٹ رائیڈرز نے بنگلہ دیش کے آل راؤنڈر شکیب الحسن کو 3 کروڑ 20 لاکھ روپے میں خریدا حالانکہ شکیب 19 مئی سے آئی پی ایل کے لیے دستیاب نہیں ہوں گے۔
بی سی سی آئی نے نیلامی سے قبل فرنچائزیز کو واضح کردیا تھا کہ بنگلہ دیش کے کھلاڑی 19 مئی کے بعد سے آئی پی ایل کے لیے دستیاب نہیں ہوں گے۔
