آئی پی ایل کی سب سے کامیاب ٹیم چنئی سُپر کنگز کو اس وقت دشچکا لگا جب ٹیم کے مضبوط کھلاڑی آل راؤنڈر ڈوین براوو زخمی ہونے کی وجہ سے لیگ سے باہر ہوگئے ہیں۔
ڈوین براوو کئی برسوں سے چنئی سُپر کنگز ٹیم کا اہم حصہ ہیں۔ زخمی ہونے کی وجہ سے 17 اکتوبر کو شارجہ میں دہلی کیپیٹلز کے خلاف آخری اوور ڈالنے سے بھی قاصر تھے جس کے بعد دھونی نے رویندر جڈیجہ کو گیند تھمائی اور ٹیم کو شکست کا منہ دیکھنا پڑا تھا۔
چنئی سُپر کنگز کے سی ای او کاسی وشوناتھن نے بتایا کہ ڈوین براوو کو جانگھ میں کافی درد اور تکلیف ہے جس کے سبب وہ آئی پی ایل سے باہر ہوگئے ہیں اور امکان ہے کہ وہ آئندہ ایک یا دو دن میں واپس گھر لوٹ جائیں گے۔
یہ پوچھے جانے پر کہ سرئیش رائنا اور ہربھجن سنگھ کے ٹیم سے باہر ہونے سے کچھ فرق پڑا تو کاسی وشوناتھن نے کہا کہ 'چاہے کوئی بھی کھلاڑی ہو فرنچائزی کا فرض بنتا ہے کہ اس ہر فیصلے کا احترام کرے اور ہربھجن سنگھ اور سریش رائنا ٹیم کے سینیئر کھلاڑی ہیں اور انہوں نے ذاتی وجوہات کی بنا پر خود کو لیگ سے باہر رکھا ہے۔
ڈوین براوو رواں آئی پی ایل سیزن میں چھ میچ کھیلے ہیں جس میں وہ دو اننگز میں صرف سات رنز بنا سکے جبکہ گیند بازی کرتے ہوئے انہوں نے چھ وکٹیں حاصل کیں۔
اس سے قبل چنئی سُپر کنگز کے تجربہ کار کھلاڑی سریش رائنا اور ہربھجن سنگھ نے ذاتی وجوہات کی بناء پر موجودہ ٹورنامنٹ میں نہ کھیلنے کا فیصلہ کیا تھا جس سے ٹیم کمزور پڑ گئی تھی۔
واضح رہے کہ اس سیزن میں چنئی سُپر کنگز 10 میچوں میں سات شکست کے بعد پلے آف کی دوڑ سے تقریباً باہر ہوگئی ہے اور اس وقت پوائنٹس ٹیبل میں آخری پوزیشن پر ہے۔
