بھارت کے لئے ڈیبیو ٹسٹ کھیل رہے بائیں ہاتھ کے تیزگیند باز ٹی نٹراجن، آل راونڈر واشنگٹن سندر اور دو سال کے طویل وقفے کے بعد اپنا دوسرا ٹسٹ کھیل رہے تیز گیندباز شاردل ٹھاکر نے تین تین وکٹیں حاصل کر کے آسٹریلیا کو چوتھے اور آخری کرکٹ ٹسٹ کے بارش سے متاثرہ دوسرے دن سنیچر کے روز پہلی اننگز میں 369 رن پر سمیٹ دیا۔
بھارت نے اس کے جواب میں دو وکٹ گنو اکر 62 رن بنا لئے ہیں اور وہ ابھی آسٹریلیا سے 307 رن پیچھے ہے۔
آسٹریلیائی ٹیم نے اپنی اننگز کو صبح پانچ وکٹ پر 274 رنز سے آگے بڑھایا اور اس کی پہلی اننگز 369 رنز پر ختم ہوئی۔ کپتان ٹم پین نے 38 رنز اور کیمرون گرین نے 28 رنز سے آگے کھیلنا شروع کیا تھا لیکن ہندوستانی گیند بازوں نے آسٹریلیائی اننگز کو 115.2 اوورز میں سمیٹ کر اسے بڑا اسکور بنانے سے روک دیا۔ ہندوستان کے گیندبازوں نے عمدہ کھیل کا مظاہرہ کیا اور آسٹریلیا کو 369 رنزپر تھام دیا۔
بھارت کی جانب سے نٹراجن نے 24.2 اوور میں 78 رن دے کر تین وکٹیں، سندر نے 31 اوور میں 89 رن پر تین وکٹیں اور ٹھاکر نے 24 اوور میں 94 رن دے کر تین وکٹیں اپنے نام کیں جبکہ تیز گیندباز سراج کو 28 اوور میں 77 رن پر ایک وکٹ ملا۔
آسٹریلیا کو پہلی اننگز میں آل آوٹ کرنے کے بعد بلے بازی کرنے اتری ٹیم انڈیا کی شروعات کچھ خاص نہیں رہی اور سلامی بلے باز شبھمن گل تیزگیندباز پیٹ کمنس کی گیند پر اسٹیون اسمتھ کو کیچ دے کر پویلین لوٹ گئے۔ گل نے 15 گیندوں میں ایک چوکے کی مدد سے سات رن بنائے۔
اس کے بعد روہت شرما نے چیتشور پوجارا کے ساتھ ہندوستانی اننگز کو آگے بڑھایا اور دونوں بلے بازوں کے بیچ دوسری وکٹ کے لئے 49 رنز کی شراکت ہوئی۔ روہت نے شاندار بلے بازی کرتے ہوئے اپنی نصف سنچری کی طرف بڑھ رہے تھے لیکن اسپنر ناتھن لیون نے مشیل اسٹارک کے ہاتھوں کیچ آوٹ کراکر روہت کی اننگز کا خاتمہ کیا۔ روہت نے 74 گیندوں میں چھ چوکوں کی مدد سے 44 رن بنائے۔
دو وکٹ جلد گنوانے کے بعد ہندوستانی اننگز کو پجارا اور کپتان اجنکیا رہانے نے رفتار دینے کی کوشش کی لیکن بارش کے سبب دوسرے دن کے تیسرے سیشن کا کھیل متاثر ہوا اور اس کے بعد میچ دوبارہ شروع نہیں ہوسکا۔ اسٹمپس تک پجارا 49 گیندوں میں آٹھ رن اور رہانے 19 گیندوں میں دو رن بناکر کریز پر موجود ہیں۔
یہ بھی پڑھیں: روٹ کی چوتھی ڈبل سنچری، انگلینڈ کی پوزیشن مضبوط
تیسرے دن پجارا اور رہانے پر ٹیم انڈیا کی اننگز کو مضبوطی سے آگے بڑھانے اور آسٹریلیا پر فیصلہ کن برتری حاصل کرنے کی ذمہ داری ہوگی جبکہ آسٹریلیا کے گیندباز ہندوستانی اننگز کو جلد سے جلد ڈھیر کرکے بڑی سبقت حاصل کرنے کی پوری کوشش کریں گے۔آسٹریلیا کی طرف سے کمنس نے چھ اوور میں 22 رن دے کر ایک وکٹ حاصل کیا جبکہ ناتھن لیون کو چھ اوور میں دس رن پر ایک وکٹ ملا۔
