انگلینڈ نے جارج تھامس، جارج بیل اور ایلکس ہارٹن کی شاندار نصف سنچریوں اور لیگ اسپنر ریحان احمد کی قاتلانہ گیند بازی کی بدولت افغانستان کو ڈک ورتھ لوئس Duck Worth Luis ضابطے کے تحت 15 رنز سے شکست دینے کے بعد انڈر 19 ورلڈ کپ کے فائنل میں جگہ بنائی ہے۔
اس کے ساتھ ہی افغانستان کا پہلی بار آئی سی سی ورلڈ کپ کے فائنل ICC U-19 World Cup میں پہنچنے کا خواب چور ہوگیا جبکہ انگلینڈ نے 24 برسوں کے بعد انڈر 19 ورلڈ کپ کے فائنل میں انٹری حاصل کی ہے۔
انڈر 19 کرکٹ ورلڈ کپ کے سیمی فائنل میں بارش کی وجہ سے میچ کو 47-47 اوورز کا کر دیا گیا تھا جس کے بعد انگلینڈ نے پہلے بیٹنگ کرتے ہوئے ترمیم شدہ 47 اوورز میں 6 وکٹوں پر 231 رنز بنائے تھے جس کے جواب میں افغانستان کی ٹیم 9 وکٹوں پر 215 رنز ہی بنا سکی اور اسے 15 رنوں سے شکست کا سامنا کرنا پڑا۔
اب فائنل میں انگلینڈ کا مقابلہ آسٹریلیا اور بھارت کے درمیان دوسرے سیمی فائنل کے فاتح سے ہوگا۔
واضح رہے کہ افغانستان ٹیم پہلی بار سیمی فائنل میں پہنچی تھی اور اسے ناتجربہ کاری کا خمیازہ بھگتنا پڑا۔
اس میچ میں انگلینڈ نے پہلے بیٹنگ کی تھی اور ایک موقع پر افغانستان نے انگلینڈ کی 6 وکٹیں 131 رنز پر گرا دی تھیں اور ایسا لگ رہا تھا کہ افغان ٹیم تاریخ رقم کرنے میں کامیاب ہو جائے گی لیکن وہ ایسا نہ کر سکی۔
آخری 12 اوورز میں افغانستان کی بالنگ بہت خراب رہی۔ اس کے گیند بازوں نے 95 رنز لُٹا دئیے اور اس ایک غلطی نے ٹیم کو ڈھانپ دیا اور 6 وکٹیں گنوانے کے باوجود انگلینڈ نے 231 رنز کا چیلنجنگ اسکور بنایا۔
انگلینڈ کی جانب سے سلامی بلے باز جارج تھامس نے شاندار نصف سنچری بنائی۔ تاہم ان کے علاوہ ٹاپ آرڈر میں کوئی دوسرا بلے باز 20 رنز کا بھی ہندسہ نہیں چھو سکا۔ تاہم مڈل آرڈر میں جارج بیل نے 67 گیندوں پر ناٹ آؤٹ 56 رنز اور ہارٹن نے 36 گیندوں پر ناٹ آؤٹ 53 رنز بنا کر انگلینڈ کو 47 اوورز میں 231 رنز تک پہنچا دیا۔
ہدف کا تعاقب کرنے اتری افغان ٹیم کا آغاز اچھا نہیں رہا۔ ٹیم کی پہلی وکٹ تیسری گیند پر ہی گر گئی۔ اس کے بعد افغان بلے بازوں نے دوسری وکٹ کے لیے 93 رنز جوڑے اور انگلینڈ کے کیمپ میں خوف و ہراس پھیلا دیا لیکن 94 رنز کے اسکور پر محمد اسحاق (43) کے رن آؤٹ ہونے کے بعد افغانستان نے تیزی سے مزید دو وکٹیں گنوادیں اور ٹیم کا اسکور 4 وکٹوں کے نقصان پر 106 رنز ہوگیا۔ بلے بازوں نے پانچویں وکٹ کے لیے نصف سنچری شراکت بنا کر افغانستان کی ٹیم کو میچ میں واپس لایا لیکن وہ ہدف حاصل کرنے میں ناکام رہے۔
انگلینڈ کی جانب سے لیگ اسپنر ریحان احمد نے چار وکٹیں لے کر انگلینڈ کو فائنل میں پہنچاتے ہوئے افغانستان کی امیدوں پر پانی پھیر دیا۔
