آئی سی سی ٹی 20 ورلڈ کپ کے بارے میں اس طرح کی خبریں گشت کر رہی ہیں کہ آئی سی سی کے ارکان کے درمیان اس بات پر اتفاق ہے کہ راوں برس ٹی 20 ورلڈ کپ عالمی وبا کورونا وائرس کی وجہ سے سال 2022 تک ملتوی کیا جا سکتا ہے۔
حالانکہ اس بات پر حتمی فیصلہ جمعرات کو آئی سی سی بورڈ کی میں ہوگا۔
آئی سی سی بورڈ کی میٹنگ میں کورونا وائرس کی وجہ سے پیدا صورتحال سے کرکٹ کے متاثر ہونے اور ورلڈ کپ کے سلسلے میں غور کیا جائے گا۔
واضح رہے کہ شیڈول کے مطابق ٹی 20 ورلڈ کپ آسٹریلیا میں 18 اکتوبر سے 15 نومبر تک کھیلا جائے گا۔
اگر چہ آئی سی سی کا کہنا ہے کہ 'اس نے ٹی 20 ورلڈ کپ ملتوی کرنے کے بارے میں کوئی فیصلہ نہیں کیا ہے اور آسٹریلیا میں اس کی تیاریاں چل رہی ہیں۔
آئی سی سی ارکان کورونا وائرس کی وجہ سے مختلف متبادل پر غور کر رہے ہیں جس میں یہ 2021 کے اوائل میں منعقد کرانے سے لے کر 2022 میں منعقد کرنے کے متبادل شامل ہیں۔
اس سلسلے میں آئی سی سی بورڈ کے ایک سینیئر اہلکار کے مطابق کورونا وائرس کی وجہ سے اس سال ورلڈ کپ منعقد کرنا کافی مشکل ہوگا۔
اگرچہ جمعرات کو کوئی باقاعدہ اعلان ہونے کا امکان مشکل نظر آرہا ہے لیکن میزبان اور براڈ کاسٹر کے مفادات کو دیکھتے آئی سی سی کو جلد ہی فیصلہ کرنا ہوگا۔
