بالی ووڈ اداکار سشانت سنگھ راجپوت کی موت کو ایک ماہ کا وقت مکمل ہونے والا ہے لیکن ان کی خودکشی معاملے میں دن بدن نئے نام سامنے آتے جارہے ہیں۔
ان کی موت کے بعد سے خودکشی کی وجہ جاننے کے لیے تحقیقات جاری ہے جس کے تحت اداکار سے وابستہ متعدد لوگوں کے بیان درج کیے جا چکے ہیں۔ ابھی بھی یہ سلسلہ جاری ہے، ان کے قریبی دوستوں اور ساتھیوں سے پوچھ گچھ جاری ہے۔
حال ہی میں پولیس نے بالی ووڈ کی ہائی پروفائل مینیجر ریشما شیٹی کا بھی بیان درج کر لیا ہے۔ پولیس نے ان سے تقریبا 4 سے 5 گھنٹوں تک پوچھ گچھ کی۔
واضح رہے کہ ریشما شیٹی بالی ووڈ میں ایک جانا پہچانا نام ہے۔ ریشما اپنے کیریئر کے دوران سلمان خان اور اکشئے کمار کی مینیجر بھی رہ چکی ہیں اور ان کے اکاؤنٹس ہینڈل کرچکی ہیں۔
سشانت سنگھ راجپوت خودکشی معاملے کے بعد سے سوشل میڈیا پر اقربا پروری کا موضوع زیر بحث ہے جس میں کئی ستارے کو تنقید کا نشانہ بنایا گیا اور ان کی فلم پر پابندی عائد کرنے کا مطالبہ بھی کیا جارہا ہے۔
واضح رہے کہ سشانت نے 14 جون کو ممبئی کے باندرہ میں واقع اپنی رہائش گاہ پر خودکشی کرلی تھی اور اس کی وجہ ذہنی تناؤ بتائی گئی۔
ان دنوں سشانت اپنی آخری فلم 'دل بیچارا' کے لیے سرخیوں میں ہیں۔ حال ہی میں اس فلم کا ٹریلر اور پہلا گانا ریلیز ہوا جسے دیکھ کر سشانت کے مداح جذباتی ہوگئے اور انہیں یاد کر رہے تھے۔
سشانت کے مداح اداکار کی اس آخری فلم کا بہت بے صبری سے انتظار کر رہے ہیں۔اس فلم کو او ٹی ٹی پلیٹفارم پر 24 جولائی کو ریلیز ہونے کے لیے پوری طرح تیار ہے۔
