بالی ووڈ کی سینئر اداکارہ شبانہ اعظمی نے حال ہی میں ایک انٹرویو کے دوران اداکارہ کنگنا رناوت کو اداکاری پر توجہ دینے کی نصیحت دی ہے۔ اس بیان پر کنگنا کا کوئی جواب نہیں آیا ہے، لیکن بہن رنگولی نے یقینی طور پر اس پر اپنا ردعمل ظاہر کیا ہے۔
دراصل بالی ووڈ اس وقت دو خیموں میں تقسیم نظر آ رہا ہے، جہاں ایک خیمہ بالی ووڈ کی حمایت میں کھڑا ہے تو دوسرا خیمہ بالی ووڈ کے خلاف نظر آرہا ہے۔ ایسے میں ایک دوسرے پر الزام عائد کرنے کا سلسلہ جاری ہے۔ اداکارہ کنگنا رناوت بھی ان دنوں اپنے بیانات کی وجہ سے کافی سرخیوں میں ہیں۔
اداکار سشانت سنگھ راجپوت کی موت کے بعد سے کنگنا کئی بار بالی ووڈ کے خلاف بیان دیتی ہوئی نظر آئی ہیں۔ اب اسی وجہ سے اداکارہ شبانہ اعظمی نے انہیں تنقید کا نشانہ بنایا ہے۔
شبانہ نے کہا ہے کہ 'کنگنا کے ذریعہ بالی ووڈ پر عائد کیے گئے الزام توہین آمیز ہیں اور وہ اپنے تصورات و تخلیات میں زیادہ بھروسہ کر رہی ہیں۔کنگنا کو وہی کام کرنا چاہیے جس میں وہ ماہر ہیں اور وہ ہے اداکاری۔'
