غداری معاملے میں بالی ووڈ اداکارہ کنگنا رناوت کو تھوڑی راحت ملی ہے۔واضح رہے کہ بامبے ہائی کورٹ نے 25 جنوری تک اداکارہ کی گرفتاری پر روک لگا دی ہے۔
کنگنا رناوت کے خلاف معاشرے میں بدآمنی پھیلانے کے لیے ایک شکایت درج کرائی گئی تھی۔ایک شخص نے ممبئی کے باندرا پولیس اسٹیشن میں ایف آئی آر درج کرائی تھی، جس میں الزام عائد کیا گیا تھا کہ کنگنا رناوت نے اپنے سوشل میڈیا پوسٹ کے ذریعہ دو فرقوں کو مشتعل کرنے کی کوشش کی گئی ہے۔
اس کے بعد ممبئی پولیس نے دونوں بہنوں کو پولیس اسٹیشن آکر بیان درج کروانے کے لیے دو بار سمن بھی بھیجا تھا، لیکن کنگنا اور رنگولی نے الگ الگ وجہ بتائی تھی اور حاضر نہیں ہوئی تھی۔
کنگنا نے بامبے ہائی کورٹ میں اس ایف آئی آر کو خارج کرنے کے لیے ایک عرضی دائر کی تھی۔بامبے ہائی کورٹ نے کنگنا رناوت کے خلاف ایف آئی آر کو خارج کرنے سے انکار کردیا تھا۔کنگنا اور ان کی بہن رنگولی کو ہدایت دیا گیا تھا کہ وہ 8 جنوری کو دوپہر 12 سے 2 بجے کے درمیان باندرا پولیس اسٹیشن میں حاضر رہیں۔جس کے بعد دونوں بہن 8 جنوری کو پولیس اسٹیشن پہنچی تھی۔پولیس نے دو گھنٹوں تک دونوں کا بیان درج کیا تھا۔
