واشنگٹن: امریکی وزیر خارجہ انٹونی بلنکن پانچ یا چھ فروری کو چین کا دورہ کریں گے۔ پولیٹیکو نیوز کی رپورٹ کے مطابق انٹونی بلنکن کے ایجنڈے میں یوکرین پر روس کی خصوصی فوجی کارروائی، چین کے جوہری ہتھیاروں اور چین میں امریکی شہریوں کی گرفتاری جیسے مسائل شامل ہونے کی توقع ہے۔ روزنامہ اخبار نے واشنگٹن میں انٹونی بلنکن کے مجوزہ دورے سے واقف سفارت کاروں کے حوالے سے اطلاع دی ہے کہ امریکی وزیر خارجہ 5-6 فروری کو چین کا دورہ کریں گے اور بیجنگ میں اپنے چینی ہم منصب کن گانگ سے ملاقات کریں گے۔
انٹونی بلنکن کا چین کا دورہ نومبر 2022 میں انڈونیشیا میں چینی صدر شی جن پنگ کے ساتھ امریکی صدر جو بائیڈن کی ملاقات کے بعد ہونے والا ہے، جس میں مسٹر بائیڈن نے چین کے ساتھ "بات چیت کا کھلا چینل برقرار رکھنے" کا عزم کیا تھا۔ اس دورہ سے اس بات کا امتحان بھی ہو گا کہ آیا دونوں صدور کے درمیان ملاقات سے کشیدگی کے وقت امریکہ اور چین کے تعلقات کو مزید نتیجہ خیز بنانے کی راہ ہموار ہوئی ہے۔ بلنکن بیجنگ میں چینی وزیر خارجہ کن گانگ سے ملاقات کریں گے۔ اس سے قبل کن گانگ کے چینی وزیر خارجہ بننے کے بعد بھی دونوں کے درمیان فون پر بات چیت ہوئی تھی۔ تب بلنکن نے کہا تھا کہ عہدہ سنبھالنے کے بعد کن جلد ہی امریکہ کا دورہ کریں گے۔ تاہم اس سے پہلے بلنکن خود اب چین کے دورے پر ہوں گے۔
یہ بھی پڑھیں: US China Foreign Ministers Talk امریکی وزیر خارجہ کی چینی وزیر خارجہ کے ساتھ ٹیلیفون پر بات چیت
یو این آئی
