اسلام آباد: پاکستان کی قومی اسمبلی نے پاکستان آرمی ایکٹ 1952 کے تحت 9 مئی کو ملک گیر فسادات کے سلسلے میں پاکستان تحریک انصاف (پی ٹی آئی) کے سربراہ عمران خان سمیت تمام شرپسند عناصر کے خلاف فوری سماعت کے لئے قرارداد منظور کرلی۔ قومی اسمبلی نے 9 مئی کے شرپسندوں کے خلاف کیسز ملٹری ایکٹ کے تحت چلانے کی قرارداد منظور کرلی۔ پاکستانی میڈیا رپورٹ کے مطابق اسپیکر راجہ پرویز اشرف کی زیر صدارت قومی اسمبلی کا اجلاس ہوا جس میں وزیر دفاع خواجہ آصف نے پاکستان تحریک انصاف(پی ٹی آئی) کے خلاف قرار داد پیش کی۔
9 مئی کے حوالے سے مذمتی قرارداد کے متن کے مطابق ایک جماعت اور اس کے قائد نے 9 مئی کو تمام حدود پار کر دیں، آئین اور قانون کی دھجیاں بکھیرتے ہوئے فوجی تنصیبات پر حملے کیے، ان کے حملوں سے ریاستی اداروں اور ملک کو ناقابل تلافی نقصان پہنچا، آئین اور قانون کے تحت ان کے خلاف کارروائی مکمل کی جائے۔ قرارداد میں کہا گیا ہے کہ ملزمان کے خلاف کارروائی میں ایک دن کی تاخیر بھی نہ کی جائے، ان کی جماعت کے کارکن اور رہنما بھی ان کی کارروائیوں سے لاتعلقی اختیار کر رہے ہیں، شرپسندوں اور مجرموں کے خلاف کارروائی کے دوران انسانی حقوق کی خلاف ورزی نہیں کی گئی۔
قرارداد کے متن کے مطابق دنیا میں فوجی تنصیبات پر حملہ کرنے پر کارروائی کا اختیار افواج کو حاصل ہوتا ہے لہٰذا تمام افراد کے خلاف پاکستان آرمی ایکٹ 1952 کے تحت کارروائی کرتے ہوئے سزائیں دی جائیں۔ اس موقع پر اپنے بیان میں خواجہ آصف کا کہنا تھاکہ ایک منصوبے کےتحت فوجی تنصیبات پر حملے کیے گئے، میانوالی ائیر بیس پر 85 جہاز موجود تھے جن کو جلانے کی کوشش کی گئی، 9 مئی کے واقعات کے تمام شواہد موجود ہیں۔
یہ بھی پڑھیں:
- عمران خان پر فوجی عدالت میں مقدمہ چلے گا، پاکستانی وزیر داخلہ
- عمران خان فوج کی حمایت کھونے سے پریشان ہیں، بلاول بھٹو
- عمران خان نے نو مئی کو ہونے والے تشدد کا عدالتی تحقیقات کا مطالبہ کیا
ان کا کہنا تھاکہ پوری دنیا میں فوجی تنصیبات پرحملوں کے کیس فوجی عدالتوں میں چلتے ہیں، ہم نے کوئی نیا قانون نہیں بنایا بلکہ یہ قانون پہلے سے موجود ہے جہاں دہشت گردی ہوگی وہاں دہشت گردی قانون کے تحت کیس چلے گا جہاں 16 ایم پی او کے تحت کیس چلنا ہے اسی کے مطابق چلے گا۔خواجہ آصف کا کہنا تھاکہ جنہوں نے جہازوں کو نشانہ بنایا، قلعہ بالا حصار کو نشانہ بنایا گیا، آرمی ایکٹ کے تحت کیس چلے گا۔ بعد ازاں قومی اسمبلی میں 9 مئی کے حوالے سے قرارداد کثرت رائے سے منظور کرلی۔ پی ایم ایل-این کے سینئر رہنما نے کہا کہ پی ٹی آئی پاکستان کی سالمیت اور خودمختاری پر حملہ کر رہی ہے۔ (یواین آئی)
