سعودی فرماں روا شاہ سلمان بن عبدالعزیز کی سربراہی میں ہونے والے کابینہ اجلاس میں عمرہ زائرین کو تمام تر سہولتیں فراہم کرنے کا فیصلہ کر لیا گیا۔
میڈیا رپورٹ کے مطابق کابینہ اجلاس میں ملک کے اہم امور کا جائزہ لیا گیا اور ملکی و بین الاقوامی امور پر غور کیا گیا۔
اجلاس کے دوران ٹی 20 کے تحت منعقد ہونے والی کانفرنس کو بھی سراہا گیا۔
کابینہ کے ارکان نے امکان ظاہر کیا کہ ٹی 20 اجلاس سے جی 20 ممالک کورونا کے انسداد کے لیے مشترکہ لائحہ عمل پر اتفاق کریں گے۔
سعودی وزارت حج و عمرہ کے مطابق رواں ماہ میں تا حال ایک لاکھ پچیس ہزار زائرین نے عمرہ ادا کیا۔ اس دوران ایک بھی کورونا وائرس (کووڈ۔19) کا کیس سامنے نہیں آیا۔
عالمی وبا کورونا وائرس (کووڈ۔19) کے باعث گزشتہ چھ ماہ سے عمرے کی ادائیگی معطل رہی۔
جس کے بعد رواں ماہ کی شروعات میں عمرہ، روضۂ رسولؐ کی زیارت اور طواف کی مشروط اجازت مل گئی۔ عمرے کی اجازت ملتے ہی لاکھوں فرزندان توحید نے خوشی کا اظہار کیا۔
یہ بات قابل ذکر ہے کہ دنیا بھر کے مسلمان اپنی زندگی میں ایک بار مکہ مکرمہ اور مدینہ منورہ کا سفر یعنی حج، زیارت اور عمرہ کرنا چاہتے ہیں۔ ان کی یہ سب سے بڑی آرزو اور دلی تمنا ہوتی ہے۔
