اٹلی کے محکمہ شہری دفاع کے سربراہ انجیلو بوریلی نے کہا کہ ملک کے شمالی لومباردیہ علاقہ میں تین مزید لوگوں کی موت کے بعد کورونا وائرس سے مرنے والوں کی تعداد بڑھ کر 17 ہو گئی ہے۔
بوریلی نے ایک پریس کانفرنس میں کہا کہ 'جمعرات تک انفیکشن کے 122 نئے معاملے سامنے آنے کے بعد کورونا وائرس سے متاثر افراد کی تعداد بڑھ کر 650 ہو گئی ہے'۔
انہوں نے کہا 'کورونا وائرس سے ہلاک ہونے والے تینوں افراد کی عمر 80 برس سے زائد تھی'۔
انہوں نے مزید کہا 'لومباردیہ میں اس بیماری سے 40 افراد صحتیاب ہوئے ہیں، سبھی علاقوں میں سے وینیتو سب سے زیادہ متاثر ہے، یہاں 37 لوگوں میں انفیکشن کی تصدیق ہوئی ہے'۔
اٹلی میں اب تک 11 ہزار 85 افراد کا ٹیسٹ کیا گیا ہے جن میں سے 650 افراد کورونا وائرس سے متاثر پائے گئے ہیں۔
کورونا وائرس سے اب تک دنیا بھر میں 2700 سے زائد افراد ہلاک ہو چکے ہیں جبکہ 75000 سے زائد افراد اس سے متاثر ہوئے ہیں۔
