چین کے سرکاری ٹیلی ویژن سی سی ٹی وی کی رپورٹ کے مطابق طالبان کے ذریعے افغانستان کے دارالحکومت کابل کا کنٹرل سنبھالنے کے بعد دارالحکومت میں چھوٹے کاروبار منگل کو دوبارہ کھلنے شروع ہوگئے۔ سی سی ٹی وی نے کابل کے ایک بازار کا دورہ کیا جہاں کی زیادہ تر دکانیں کھلی ہوئی ہیں۔
کچھ دکان مالکان نے میڈیا کو بتایا کہ وہ طالبان کے قبضے کے بعد بڑے پیمانے پر ہونے والی خونریزی سے پریشان تھے لیکن اب سکون محسوس کررہے ہیں کیونکہ انہیں لگتا ہے کہ صورتحال مستحکم ہوگئی ہے۔
مقامی دکاندار حامد کا کہنا ہے کہ "فی الحال، ہمیں حفاظتی مسائل کا سامنا نہیں ہے کیونکہ کاروبار آہستہ آہستہ دوبارہ شروع ہورہا ہے اور صورتحال مستحکم ہورہی ہے۔ مجھے امید ہے کہ طالبان لوگوں کو امن اور استحکام فراہم کرنے کے لیے مزید کام کریں گے۔"
رپورٹ کے مطابق کابل پرسکون ہے کیونکہ اس کی سڑکوں پر طالبان گشت کررہے ہیں لیکن ملک بھر میں طالبان کی کامیابی کے دوران جیلوں اور اسلحہ خانے خالی ہونے سے لوگ خوفزدہ ہیں۔
کابل کے رہائشی ناصر احمد کا کہنا ہے کہ "مجھے امید ہے کہ مستقبل کی قیادت ہتھیار جمع کراسکتی ہے اور امن و استحکام کی سمت میں کامیابی حاصل کرسکتی ہے تاکہ افغان عوام امن کے ساتھ ملک میں رہ سکیں۔"
یہ بھی پڑھیں: طالبان جنگ جیت چکے ہیں، اس لیے ان سے بات کرنی ہوگی: یوروپی یونین
ظاہر ہے کابل کا بازار دوبارہ کھلنا افغان باشندوں کے لئے ایک اچھی خبر ہے لیکن طالبان کو ملک کو پٹری پر لانے کے لئے بہت کام کرنا ہوگا۔
