پیر کو ایران کی وزارت خارجہ کے ترجمان عباس موسوی نے متنبہ کیا ہے کہ اگر ریاستہائے متحدہ امریکہ وینزویلا جانے والے ان کے ٹینکرز کے خلاف کوئی اقدام کرتا ہے تو اسلامی جمہوریہ اس پر ردعمل کا اظہار کرے گا۔
انہوں نے تہران میں ایک پریس کانفرنس کے دوران کہا کہ 'امریکیوں نے دنیا کے مختلف مقامات پر ہمارے آئل ٹینکرز کے بارے میں جو کچھ کہا ہے، وہ غیر قانونی اور بے شرمی پر مبنی ہے'۔
خیال رہے کہ تہران اور واشنگٹن کے مابین سخت کشیدگی اور امریکی کی جانب سے ایران پر اقتصادی پابندیوں کے باوجود ایران کے پانچ ٹینکرز نے کم از کم 45.5 ملین ڈالر مالیت کا پٹرول اور اسی طرح کی مصنوعات لے کر وینزویلا کا رخ کیا ہے۔
موسوی نے مزید کہا کہ ایران کا شام سے دستبرداری کا کوئی ارادہ نہیں ہے۔ شامی حکومت اور قوم کی خواہش پر ایران ان کے ساتھ رہے گا۔
انہوں نے کہا کہ شام میں ایران کی موجودگی سے امریکہ یا اسرائیل سے کوئی تعلق نہیں ہے۔
