پاکستان کے 74 ویں یوم آزادی کے موقع پر منعقدہ مرکزی تقریب میں وزیراعظم عمران خان نے پھر ایک بار مسئلہ کشمیر کو اٹھایا۔
کورونا وبا میں کچھ کمی کے درمیان پاکستان بھر میں آج 74 ویں یوم آزادی کے موقع پر جشن منایا گیا، قومی پرچم لہرانے کی تقاریب منعقد کی گئیں، ریالیاں نکالی گئیں اور ملک قومی گیت کے نغموں سے گونج اٹھا۔
پاکستان کے مقبوضہ کشمیر کا بھی یہی حال رہا جہاں یوم آزادی تقاریب کا جوش و خروش کے ساتھ انعقاد عمل میں آیا۔
بین الاقوامی فورمس میں ناکامی کے بعد وزیراعظم عمران خان نے آج ایک بار پھر مسئلہ کشمیر کو اٹھایا۔ انہوں نے یوم آزادی تقریب سے خطاب کرتے ہوئے عوام کو مبارکباد دی اور مسئلہ کشمیر پر مسلسل آواز اٹھانے کی بات کہی۔
واضح رہے کہ قبل ازیں عمران خان نے یہ اعتراف کیا تھا کہ ان کا ملک مسئلہ کشمیر کو بین الاقوامی سطح پر بہتر انداز میں اٹھانے کی کوششوں میں ناکام ہوچکا ہے۔
