کینیڈا کے وزیراعظم جسٹن ٹروڈو نے اظہار آزادی کی حد پر زور دیتے ہوئے کہا ہے کہ کوشش کی جانی چاہیے کہ غیر ضروری طور پر لوگوں کی دل آزاری نہ ہو۔ آزادی اظہار رائے کا دفاع ضرور کیا جائے لیکن حدود کے بغیر نہیں۔
جسٹن ٹروڈو نے کہا کہ 'ہمیں دوسروں کے احترام کے ساتھ کام کرنا چاہیے اور کوشش کرنی چاہیے کہ غیر ضروری طور پر لوگوں کی دل آزاری نہ ہو'۔
انہوں نے کہا کہ 'ہمیں یہ پتہ ہونا چاہئے کہ ہمارے منھ سے نکلے الفاظ اور ہمارے اعمال کا دوسروں پر کیا اثر مرتب ہو رہا ہے'۔
وزیراعظم کینیڈا نے کہا کہ ان پیچیدہ مسائل پر ذمےداری کے ساتھ ڈائیلاگ کے لیے معاشرہ تیار ہے اور بات چیت کی جانی چاہئے۔
قبل ازیں مصر کے صدر عبدالفتح السیسی نے بھی دل آزاری والے کارٹون کی فرانس میں اشاعت کی پُر زور مذمت کی اور پیغمبر اسلام کے یومِ ولادت کی تقریب سے خطاب کرتے ہوئے کہا کہ کسی بھی نبی یا پیغمبر کی شان میں گستاخی مذہبی قوانین کی خلاف ورزی ہے۔
