ہفتے کی شب امریکہ کے دارالحکومت واشنگٹن ڈی سی میں صدر ڈونلڈ ٹرمپ کے حامیوں اور بلیک لائفس میٹرز کے مظاہرین کے مابین جھڑپیں ہوئیں۔ اس دوران کم از کم ایک چاقو زنی اور 20 افراد کی گرفتاری کی اطلاع موصول ہوئی ہے۔
دن میں ٹرمپ کے کئی ہزار حامی یکجا ہوئے تھے، جنہوں نے انتخابی نتائج پر احتجاج کیا تھا۔ دن کے وقت واشنگٹن ڈی سی میں پر امن مظاہرے ہو رہے تھے، جبکہ رات میں یہ مظاہرے پُر تشدد ہو گئے۔
سوشل میڈیا پر پوسٹ کی جانے والی ویڈیوز میں دکھایا گیا ہے کہ جب ٹرمپ حامیوں کے چھوٹے گروپز نے وائٹ ہاؤس کے ایک بلاک کے قریب بلیک لائفس میٹر پلازہ کے آس پاس کے علاقے میں داخل ہونے کی کوشش کی، تو اس دوران جھڑپیں ہوئیں۔
عہدیداروں نے بتایا کہ گرفتار کیے گئے افراد کے خلاف متعدد قسم کے الزامات کیس درج کیا گیا ہے، جن میں حملہ کرنا اور اسلحہ رکھنا شامل ہے۔ اس دوران پولیس کے دو اہلکار بھی زخمی ہوئے اور متعدد آتشیں اسلحہ برآمد کیا گیا۔
تقریبا 10 روز قبل امریکی صدارتی انتخابات میں ڈیموکریٹک پارٹی کے امیدوار جو بائیڈن کو کامیابی ملی ہے، ایسے میں ٹرمپ اور ان کے حامی الزام لگا رہے ہیں کہ بائیڈن نے انتخابات میں دھاندلی کی ہے۔ اسی وجہ سے مظاہرے ہو رہے ہیں۔
