کینیڈا کی مشہور کمپنی میڈی کاگو نے دعویٰ کیا ہے کہ اس کی جانب سے کوویڈ۔19 کے علاج کےلیے چوہوں پر کی گئی تحقیق کے مثبت نتائج برآمد ہوئے ہیں۔
کمپنی نے مزید دعویٰ کیا ہے کہ اس نے پودوں سے ویکسین تیار کی ہے جو وبا سے لڑنے میں مددگار ثابت ہوگی۔ ویکسین کی تیاری پر کی گئی تحقیق کے اچھے نتائج برآمد ہوئے ہیں۔
کمپنی کے مطابق انہوں نے چوہے پر ویکسین کی ایک خوراک استعمال کی جس کے بعد دس دن تک اینٹی باڈیز حاصل ہوئے۔
میڈی کاگو کی جانب سے کینیڈا کی حکومت اور امریکہ کی ایف ڈی اے سے اس سلسلہ میں انسانوں پر تحقیق کرنے کی اجازت طلب کی گئی ہے جبکہ کمپنی کے مطابق انسانوں کو دی جانے والی خوراک کی مقدار کے بارے میں ابھی فیصلہ کیا جانا باقی ہے۔
کمپنی نے مزید بتایا کہ تمام رسمی کاروائیوں اور کلینیکل ٹرائلز کے نتائج دیکھنے کے بعد ہم آگے بڑھیں گے اور سال کے اواخر تک ہم لاکھوں ویکسین تیار کرنے کے لیے کوشاں ہے۔
میڈی کاگو نے اس سے پہلے بھی متعدد امراض کےلیے ویکسین تیار کی ہے جبکہ 2009 میں صرف 19 دنوں کے دوران کمپنی نے H1N1 فلو کی ویکسین تیار کرلی تھی۔
