فلمساز سُجوئے گھوش سہانا خان کی سنیماگھروں میں ریلیز ہونے والی پہلی فلم کی ہدایتکاری کرسکتے ہیں۔ جس میں شاہ رخ خان بھی نظر آئیں گے۔ واضح رہے کہ گزشتہ روز ایک رپورٹ آئی تھی جس میں کہا گیا تھا کہ شاہ رخ خان پہلی بار اپنی بیٹی سہانا خان کے ساتھ فلم میں نظر آئیں گے اور یہ فلم سہانا کی سنیماگھروں میں ریلیز ہونے والی پہلی فلم ہوگئی۔Sujoy Ghosh direct Suhana Khan film
گھوش اس سے قبل شاہ رخ کے پروڈکشن ہاؤس ریڈ چلیز انٹرٹینمنٹ کے تحت بننے والی تاپسی پنو اور امیتابھ بچن کی تھرلر فلم بدلہ (2019) کی ہدایت کاری کر چکے ہیں۔ انہوں نے شاہ رخ کی ریڈ چلیز انٹرٹینمنٹ کے ساتھ فلم کہانی اسپن آف باب بسواس کو بھی پروڈیوس کیا، جس میں ابھیشیک بچن نے اداکاری کی تھی۔
پنک ولا کی ایک رپورٹ کے مطابق' شاہ رخ خان اور سُجوئے گھوش نے امیتابھ بچن اور تاپسی پنو کی فلم بدلہ میں کام کیا تھا۔ شاہ رخ خان نے جہاں اس فلم کو پروڈیوس کیا تھا وہیں گھوش اس فلم کے ہدایتکار تھے۔ اب یہ دونوں ایک دوسرے کے ساتھ دوبارہ کام کرنے کے لیے تیار ہیں۔ یہ ایک ایکشن تھرلر فلم ہوگی۔ فی الحال فلم سے متعلق دیگر تفصیلات کو خفیہ رکھا گیا ہے۔ یہاں تک کہ سجوئے بطور ڈائریکٹر ایک نئی طرح کی فلم پر کام کرنے کے لیے پرجوش ہیں'۔
سُجوئے نے 2003 کے میوزیکل جھنکار بیٹس سے اپنی ہدایت کاری کی شروعات کی، جس نے حال ہی میں اپنی ریلیز کے 20 سال مکمل کیے ہیں۔ انہوں نے ودیا بالن کے ساتھ فلم کہانی (2012) اور کہانی 2: درگا رانی سنگھ (2016) اور تاپسی کے ساتھ بدلہ میں کام کیا ہے۔ ان کی جلد ہی کرینہ کپور خان، وجے ورما اور جئے دیپ اہلاوت کے ساتھ ایک فلم آنے والی ہے۔
واضح رہے کہ گزشتہ روز یہ خبر سامنے آئی تھی کہ سہانا خان کی پہلی فلم جو سنیماگھروں میں ریلیز ہوگی، میں شاہ رخ خان نظر آئیں گے، حالانکہ وہ اس فلم میں بطور مرکزی کردار کام نہیں کریں گے۔ ان کی اس فلم کو پروڈیوس شاہ رخ خان کی پروڈکشن ہاؤس ریڈ چیلیز انٹرٹینمنٹ کرے گی۔سہانا اس نئی فلم سے سینما گھروں میں اپنی شروعات کریں گی، کیونکہ زویا اختر کی ہدایت کاری میں بننے والی ان کی پہلی فلم دی آرچیز اس سال 24 نومبر کو نیٹ فلکس انڈیا پر پریمیئر ہوگی۔
