ریاست بہار کی دارالحکومت پٹنہ میں 12 مئی کو آٹھ پارلیمانی حلقوں میں ہونے والے چھٹے مرحلے کے پارلیمانی انتخاب کی تیاریاں ریاستی الیکشن کمشن نے مکمل کر لی ہے۔
چھٹے مرحلے میں آٹھ پارلیمانی سیٹوں پر انتخاب ہونے ہیں، جن میں 1 کروڑ 38 لاکھ 2 ہزار 576 رائے دہندگان ہیں جبکہ 13 ہزار 973 پولنگ مراکز قائم کیے گئے ہیں۔ اس مرحلے میں 127 امیدوار اپنی قسمت آزما رہے ہیں۔
جوائنٹ چیف الیکٹرول آفیسر پروین کمار گپتا نے بتایا کہ چھٹے مرحلے میں127 امیدوار اپنی قسمت آزما رہے ہیں اس مرحلے میں آٹھ پارلیمانی حلقوں میں انتخاب ہونے ہیں۔
انہوں نے مزید کہا کہ اس مرحلے میں گوپال گنج رائے دہندگان اور حلقہ کے اعتبار سے سب سے بڑا پارلیمانی حلقہ ہے جبکہ مغربی چمپارن اس کے مقابلے میں سب سے چھوٹا ہے۔
اس مرحلے میں مشرقی چمپارن اور مغربی چمپارن کی سرحدیں پڑوسی ملک نیپال سے متصل ہیں، اس لیے ان علاقوں میں سخت نگرانی کی جا رہی ہے۔
وہیں ان سرحدوں کو سیل کر دیا گیا ہے جبکہ سیوان کی سرحدیں اترپردیش سے متصل ہیں، ان کو بھی سیل کردیا گیا ہے۔
ان تمام علاقوں میں پیرا ملٹری فورس اور پولیس اہلکاروں کو تعینات کر دیا گیا ہے۔
