ضمنی انتخابات کے لیے کانگریس کمربستہ

عام انتخابات میں شکست کے بعد کانگریس پارٹی اپنے تنظیمی ڈھانچے کو درست کرنے میں لگ گئی ہے۔ فی الحال کانگریس کی نظر اترپردیش میں ہونے والے ضمنی انتخابات پر ہے۔ کانگریس کی کوشش ہے کہ وہ ان انتخابات میں کامیاب ہو کر 2022 میں ریاست میں اپنی حکومت تشکیل کرے۔

ریاست اترپردیش کے ضلع بارہ بنکی میں ضمنی انتخابات کے مد نظر کانگریس کارکنان کی ایک اہم میٹنگ ہوئی۔

میٹنگ میں محکمہ درج فہرست ذات کے سکریٹری ڈاکٹر ایس پی سنگھ نے تنظیمی ڈھانچہ درست کرنے کے اہم نقاط پیش کئے۔

انہوں نے ہدایت دی ہے کہ کانگریس کو ریاست کے تمام گاؤں میں دو کارکنان بنانے ہیں۔

انہوں نے یہ بھی ہدایت دی ہے کہ ضمنی انتخابات کے مد نظر پارٹی رہنماء گاؤں کا دورہ شروع کریں اور اس دوران رات میں وہیں قیام بھی کریں۔

قابل ذکر ہے کہ اترپردیش میں تقریبا ایک درجن اسمبلی نشستوں پر انتخابات ہونے ہیں۔ ان میں سے ایک بارہ بنکی کی زیدپور اسمبلی نشست بھی ہے۔ یہ نشست اوپیندر سنگھ راوت کے رکن پارلیمان منتخب ہونے کے بعد خالی ہوئی ہے۔